Oralda badmıntonnan halyqaralyq týrnır ótýde
ORAL. QazAqparat – Oralda badmıntonnan «Condensate Kazakhstan International Series 2019» halyqaralyq týrnıri ótýde, dep habarlaıdy QazAqparat tilshisi.
Úshinshi ret uıymdastyrylyp otyrǵan bul doda Ortalyq Azııadaǵy osyndaı birden-bir jarys bolyp tabylady.
Aldaǵy jyly Tokıo Olımpıadasy ótetindikten, qazirgi kezde badmıntonshylar da joldamaǵa ıe bolý úshin osyndaı týrnırlerde sátti óner kórsetip, upaı jınaýdy maqsat etedi.
Jyl saıyn aýqymy keńeıip kele jatqan týrnırge álemniń 16 elinen júzge jýyq sportshy qatysýda. Oǵan japonııalyq Tomoharý Sano bastaǵan tóreshiler qazylyq etýde.
Bas tóreshiniń kómekshisi Asqar Ormanovtyń sózine qaraǵanda, Qazaqstannan 35 sportshy baq synaýda.
Badmınton saıysy (bas demeýshisi – «Kondensat» kompanııalar toby) 10 qarasha kúni márege jetip, jeńimpaz-júldegerler anyqtalady.
