Oralda badmıntonnan halyqaralyq týrnır márege jetti
ORAL. QazAqparat – Oralda badmıntonnan«Condensate Kazakhstan International Series 2019» halyqaralyq týrnıri márege jetti, dep habarlaıdy QazAqparat tilshisi.
Badmınton olımpıadalyq oıyn túri bolǵandyqtan, osyndaı jarystarǵa qatysyp, kóbirek upaı jınaýdyń mańyzy zor.
Jarystyń bas tóreshisi, japonııalyq Tomoharý Sano týrnırge álemniń 16 elinen 95 sportshy qatysyp, baq synaǵanyn jetkizdi.
Badmıntonnan Qazaqstan quramasynyń bas bapkeri Asqar Ormanovtyń aıtýynsha, Qazaqstannan - 35, Reseıden - 25 badmıntonshy qatyssa, Tájikstannan - 7, Ózbekstannan - 6, alys Aýstralııadan - 4 sportshy keldi. Degenmen bul týrnırde de osy sport túrinen myqtylar qataryndaǵy danııalyqtar aldyna jan salmaı tur.
Aralas juptyq synda qazaqstandyq Artýr Nııazov reseılik Olga Ivaşenkomen birge fınalǵa shyqqanymen, sońǵy básekede danııalyqtarǵa ese jiberdi. Taǵy bir qazaqstandyq Dmıtrıı Panarın moldovalyq Vlada Gıngamen birge úshinshi orynǵa kóterildi.
Týrnır chempıonyna - 2500, kúmis júldegerge - 2250, úshinshi oryn ıegerine - 2000 upaı beriledi.
«Tokıo Olımpıadasyna irikteý saıystary bıylǵy 1 mamyrdan bastaldy. Áıtse de tıisti qarjylandyrýǵa qol jetpegendikten, qazaqstandyqtar ondaı týrnırlerge qatysa almady. Qatyspaǵannan keıin upaı da jınaı almaıdy. Olımpıadaǵa irikteýden ótý úshin bizdiń esebimiz boıynsha sportshy álemniń 60 úzdiginiń qataryna enýi kerek. Mysaly, upaı sanaý kezinde badmıntonshynyń tabysty óner kórsetken on dodasynyń qorytyndysy eskeriledi. Ol úshin keminde jıyrma týrnırde baq synaýy kerek. Jańa jyldan bastap qarjylandyrý kóbeıedi degen úmit bar. Olımpıadaǵa irikteý 31 sáýirde aıaqtalady. Barynsha kúsh salamyz, degenmen, kún sanap úmit azaıyp barady. Qazaqstan quramasynda eresekter, jastar jáne jasóspirimder tobynyń árqaısysynda 15 sportshydan jattyǵýda. Ázirge Dmıtrıı Panarınniń ótken jyly jasóspirimder olımpıadasyna qatysqany ǵana kóńilge sep bolyp tur», - dedi QazAqparat tilshisine A.Ormanov.
Reseılik tájirıbeli badmıntonshy O.Ivaşenko Qazaqstannan Artýr Nııazov pen Dmıtrıı Panarınnen basqa qyzdardan eshkim kózge túse almaǵanyn aıtty.
«Badmınton sportymen aınalysqanyma 12 jyl boldy. Qostanaılyqpyn, 19 jastamyn. Tokıoǵa barýdan úmit úzgenimmen, qarjylaı qoldaý bolsa, 2024 jylǵy Olımpıadaǵa irikteýden ótýge tyrysamyn», - dedi Dmıtrıı Panarın.
Eske sala keteıik, budan buryn Oralda badmıntonnan halyqaralyq týrnır ótip jatqanyn jazǵan bolatynbyz.
