Oralda azyq-túlik dúkenine qaraqshylyq shabýyl jasaǵan kúdikti ustaldy
ASTANA. KAZINFORM – 30 shilde kúni saǵat 15:40–ta polıtsııanyń «102» arnasyna Oral qalasyndaǵy dúkenderdiń birinde belgisiz er adamnyń betperde kıip, satýshyny pyshaqpen qorqytyp, kassadaǵy qolma-qol aqshany alyp ketkeni týraly habarlama túsken.
Aqparat boıynsha oqıǵa ornyna jetken tártip saqshylary dúken men oǵan irgeles aýmaqtaǵy beınebaqylaý kameralarynyń jazbalaryn jedel zerdelep, kúdiktiniń fotokeskinin ázirledi.
Birneshe mınýttyń ishinde barlyq narıad pen qyzmetterge baǵdar berilip, aýmaq tolyq qorshaýǵa alyndy. Tártip saqshylary kúdiktiniń ýaqyt jaǵynan alysqa uzap úlgermegenin eseptep, izdeýdi jaqyn mańnan bastady. Bul boljam dál shyqty. Kóp uzamaı tártip saqshylary kúdiktiniń qalyń shóptiń arasynda jasyrynyp jatqanyn baıqap qalady. Alaıda ol qolyndaǵy pyshaqpen polıtsııa qyzmetkerlerine tap beredi. Ómirlerine tóngen qaýipke qaramastan Oral qalalyq polıtsııa basqarmasynyń qyzmetkerleri Erkebulan Jumaqashev pen Berik Lýkpanov joǵary jaýyngerlik daıyndyq tanytty.
Arnaıy ádisterdi sheber qoldanǵan olar qarýly shabýyldaýshyny sanaýly sátter ishinde quryqtady. Oqıǵa saldarynan eshkim zardap shekken joq. Ustalǵan azamattyń 29 jasta ekeni anyqtaldy. Qazirgi ýaqytta ol ýaqytsha ustaý ızolıatoryna qamaldy. Atalǵan derek boıynsha sotqa deıingi tergep-tekserý amaldary júrgizilýde. Sonymen qatar kúdiktiniń ózge de qylmystarǵa qatysy bar-joǵy tekserilip jatyr.
