Oralda Azıada alaýyn alyp júrýshilerdiń biri - «Azıada alaýy» ánuranynyń avtory E.Hasanǵalıev
ORAL. 15 qańtar. QazAqparat /Eljan Eraly/ - 18 qańtarda elimizdiń batys qaqpasy - Oral qalasynda qysqy Azııa oıyndarynyń alaýyn saltanatpen alyp júrý rásimi ótkizilmek.
Osyǵan oraı alaýgerlerdiń qatysýymen daıyndyq taǵy bir pysyqtaldy. Oralda atalmysh saltanat eki kezeńmen uıymdastyrylmaq. Jeńis alańynan Mánshúk Mámetova alańyna deıin, odan alaý muz sporty saraıyna deıin jetkizilmek. Osynda saltanat merekelik kontsertke ulaspaq.
Alaýgerler qatarynda oblys basshylarynan bastap sport salasynyń ardagerleri, mádenıet jáne óner qaıratkerleri, ataqty sportshy-jastar da bar. Batysqazaqstandyqtar Astana men Almatyda ótkiziletin qysqy Azııa oıyndarynyń «Azıada alaýy» ánuranyn (sózin jazǵan belgili aqyn Ótegen Oralbaev) jerlesteri, tanymal kompozıtor, Qazaqstan halyq ártisi Eskendir Hasanǵalıev shyǵarǵanyn maqtan etedi. Alaý ustaýshylardyń biri de - osy E.Hasanǵalıev. Aq Jaıyq aspanynda «Azıada alaýy» ánurany qalyqtaıtyn bolady.
Osy kúnderi óńirde Azıadaǵa arnalǵan túrli sharalar uıymdastyrylýda.
