Oralda «Azamattarǵa arnalǵan úkimet» qyzmetkeri mas kúıinde ustalyp, 15 táýlikke qamaldy
BQO Polıtsııa departamentiniń resmı ókili Bolatbek Nurǵojınniń málim etkenindeı, Oral qalasy mamandandyrylǵan ákimshilik soty 11 shildede N. degen azamatqa qatysty QR Ákimshilik quqyq buzýshylyq týraly kodeksiniń 608-baby 1-bóligine sáıkes ákimshilik materıaldy qarady.
Sotta anyqtalǵanyndaı, oqıǵa 9 shilde kúni boldy. Avtokólik ishinde otyrǵan N. mas kúıinde bolǵan. Ol kóligin basqarýdy mas dosyna bergen. Alaıda N. medıtsınalyq kýálandyrýdan ótý jónindegi polıtsııa qyzmetkeriniń zańdy talabyn oryndamaǵan.
Sot sheshimimen N. 15 kúnge ákimshilik qamaqqa alynyp, 7 jylǵa kólik quralyn júrgizý quqyǵynan aıyryldy. Ol Oral qalasy polıtsııa basqarmasy arnaıy qabyldaý ornyna ornalastyryldy.
Osy oqıǵaǵa oraı «Azamattarǵa arnalǵan úkimet» memlekettik korporatsııasy BQO boıynsha fılıaly túsinikteme berdi.
«Ustalǵan Qaıyrbek Nıǵımov - memlekettik korporatsııanyń qaýipsizdik boıynsha ýákiletti ókili. Ol mamandandyrylǵan HQO qyzmetkeri emes, teorııalyq jáne praktıkalyq emtıhandar qabyldaý onyń qyzmettik mindetine kirmeıdi. Oqıǵa jumystan tys ýaqytta bolǵan. Nıǵımov jeke kóliginde bolǵanymen, rýlde otyrmaǵan. Sot sheshimimen ol 15 táýlikke qamalyp, mas kúıinde rýldi basqa adamǵa bergeni úshin kólik júrgizý quqyǵynan aıyryldy. Bul - ákimshilik quqyq buzýshylyq, mundaı turmystyq jaǵdaı kúnde bolyp jatady. Nıǵımov sot sheshimimen kelispeıdi, sondyqtan apellıatsııalyq sotqa júginetin bolady. Sot talqysy kezinde qyzmetker kúntizbelik demalysynda bolady», dep habarlady vedomstvodan.