Oralda aıyppulyn tóleı almaǵan burynǵy polıtseı túrmede jazasyn óteıdi

ORAL. QazAqparat - Oralda aıyppulyn tóleı almaǵan burynǵy polıtsııa qyzmetkerleri túrmede jazasyn óteıdi, dep habarlaıdy QazAqparat tilshisi.

BQO sotynyń baspasóz qyzmetinen túsken málimetke qaraǵanda, Alfııa Habıbýllına, Ásem Naızabekova jáne Baqytjamal Esenálıeva QR QK 366-baby 3-bóligi 2-tarmaǵyna sáıkes aıypty dep tanylǵan bolatyn.

Oral qalalyq sotynyń bıylǵy 15 aqpandaǵy úkimimen olardyń árqaısysyna paranyń jetpis eselengen mólsherinde, ıaǵnı 17,5 mln teńge kóleminde aıyppul salynǵan edi.

Sonymen qatar, burynǵy polıtsııa qyzmetkerleri jergilikti ózin-ózi basqarý jáne memlekettik organdarda laýazymdy qyzmet atqarý quqyǵynan ómir boıyna aıyrylyp, A.Habıbýllına men B.Esenálıeva kapıtan, Á.Naızabekova leıtenant shenimen qosh aıtysqan bolatyn.

Zańǵa sáıkes aıyppul úkimde kórsetilgen merzimde tólenbegen jaǵdaıda bas bostandyǵynan aıyrý jazasyna aýystyrylady.

Oral qalalyq sotynyń qaýlysymen atalǵan úsh sottalýshyǵa 17,5 mln teńge kólemindegi aıyppul jazasy 7 jyl bas bostandyǵynan aıyrý jazasyn qaýipsizdigi orta qylmystyq-atqarý júıesi mekemesinde óteýge aýystyryldy.

Sot qaýlylary zańdy kúshine engen joq.

Eske sala keteıik, budan buryn Oralda paraqor polıtseılerge 17,5 mln teńgeden aıyppul salynǵanyn jazǵan bolatynbyz.