Oralda áıeldiń qyzylshamen aýyrǵany anyqtaldy
ORAL. QazAqparat - Oralda áıeldiń qyzylshamen aýyrǵany anyqtaldy, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz qyzmetinen túsken málimetke qaraǵanda, 1980 jylǵy áıel qańtar aıynyń sońynda Astana qalasynan kelgen.
Aqpan aıynyń basynda naýqas 39,5 gradýsqa deıin qyzýy kóterilip, jótelip, tamaǵy aýyrǵandyqtan, medıtsınalyq mekemege júgingen.
«Úsh kúnnen keıin onyń betinde, sodan keıin denesinde, aıaqtarynda bórtpe paıda boldy. Naýqas dereý juqpaly aýrýlar aýrýhanasyna jiberildi. Dıagnozy rastalǵannan keıin sonda jatqyzyldy», dedi densaýlyq saqtaý basqarmasynyń baspasóz hatshysy Aınagúl Saqposynova.
Bul - sońǵy jyldardaǵy birinshi jaǵdaı. 2016-2018 jyldary óńirde qyzylsha aýrýy tirkelmegen edi.
A.Saqposynovanyń aıtýynsha, oblysta qyzylshaǵa qarsy ekpe jetkilikti mólsherde satyp alynǵan.
Qyzylsha - jyldam taralatyn juqpaly aýrý, dene qyzýy kóterilip, muryn, kóz, tamaq qabynyp, teride bórtpe paıda bolady.
Eske sala keteıik, budan buryn BQO-da qyzylshamen aýyrý oqıǵalary tirkelmegenin jazǵan bolatynbyz.
