Oralda áıeldi katermen qaǵyp óltirgen jasóspirimge qatysty sot úkimi shyqty
ORAL. QazAqparat – BQO kámeletke tolmaǵandar isi jónindegi mamandandyrylǵan aýdanaralyq sotynda Artem Krylovqa qatysty úkim shyqty, dep habarlaıdy QazAqparattilshisi.
Sotta katermen áıeldi qaǵyp, qazaǵa ushyratý deregi boıynsha is qaraldy.
17 jastaǵy A.Krylov QR QK 104-baby 1-bóligine (abaısyzda qazaǵa ushyratý) sáıkes aıypty dep tanylyp, onyń bir jylǵa bas bostandyǵy shekteldi. Atalǵan merzimge probatsııalyq baqylaý ornatyldy.
Sýdıa Janar Eshpanovanyń aıtýynsha, is jábirlenýshiniń qatysýymen prokýror men sottalýshynyń arasynda jasalǵan protsestik kelisimmen sotqa túsken.
«Kelisim boıynsha prokýror kináli adamǵa bir jyl merzimge bas bostandyǵyn shekteý jazasyn taǵaıyndaýdy surady.
Protseske qatysýshylar munymen kelisti. Sotta jábirlenýshiler kelisimdi qoldap, moraldyq zalaldyń ótelgenin rastady. Zań boıynsha sot prokýrormen belgilengen bapty qatańdatylǵan bappen sottaýǵa quqyly emes. Sondyqtan sottalýshy atalǵan bapqa sáıkes kináli dep tanyldy», dedi J.Eshpanova.
Sot sondaı-aq katerdi qujatsyz jáne ruqsatsyz júrgizý deregi boıynsha jaýapkershilikke tartý máselesin sheshý úshin jeke qaýly shyǵardy.
Sot úkimi zańdy kúshine engen joq.
Eske sala keteıik, budan buryn Oralda ózende shomylyp júrgen áıeldi belgisiz bireýdiń qaıyqpen janshyp óltirgenin, keıin kúdiktiniń ustalǵanyn jazǵan bolatynbyz.
