Oralda áıeldi atyp óltirgen kúdikti ustaldy
ORAL. QazAqparat - Oralda áıeldi atyp óltirgen kúdikti ustaldy, dep habarlaıdy QazAqparat tilshisi.
BQO Іshki ister departamentiniń baspasóz qyzmetinen túsken málimetke qaraǵanda, 10 mamyr kúni keshkisin óz páterinen áıeldiń múrdesi tabyldy. Onyń ishinen oq tıgen.
Sonymen qatar ishinen jaralǵan er adam aýrýhanaǵa jetkizildi.
Polıtsııa qyzmetkerleri qylmystyń izin sýytpaı, oq atqan kúdiktini anyqtap, qolǵa túsirdi.
Qazirgi kezde QR QK 99-baby, 2-bóligine sáıkes sotqa deıingi tergeý amaldary júrgizilýde.
BQO densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, qalalyq kópbeıindi aýrýhanada jatqan 1951 jylǵy er adamnyń jaǵdaıy burynǵysynsha aýyr.
Eske sala keteıik, Oralda er adam 60 jasar enesin atyp óltirip, qaıyn atasyn jaralaǵanyn budan buryn jazǵan bolatynbyz.
Keıin belgili bolǵanyndaı, keshe kúdikti men onyń áıeliniń ajyrasqany jóninde sot sheshimi shyqqan. Qandy oqıǵa sodan keıin oryn alǵan. Sol páterde kúdiktiniń áıeli men uly bolǵan, olar aman qalǵan.
