Oralda áıelderdi tonaǵan qaraqshy ustaldy
ORAL. QazAqparat - Oral qalasynda áıelderdi tonaǵan qaraqshy ustaldy, dep habarlaıdy QazAqparat tilshisi.
Oral qalasy polıtsııa basqarmasynyń baspasóz qyzmetinen túsken málimetke qaraǵanda, 1971 jylǵy turǵyn ótken naýryz aıynda tórt ret osyndaı qylmys jasaǵan.
Otbasyn qurmaǵan, esh jerde jumys jasamaıtyn A. esimdi turǵyn Eýrazııa dańǵyly, Qurmanǵazy jáne Isaev kósheleri boıynda qarańǵy ýaqytta jalǵyz ózi ketip bara jatqan qyz-kelinshek, áıelderge shabýyl jasap, qolyndaǵy sómke, ámııan, aqsha, uıaly telefondaryn tartyp alyp otyrǵan. Keıbireýlerin úı kireberisteri aldynda kútip turyp, artynan ilesip, uryp-soǵyp, qolyndaǵy baryn tartyp alǵan. Olardan 6 myńnan 50 myńǵa deıingi aqshalaryn, altyn buıymdaryn jymqyrǵan.
Tártip saqshylary kúdiktini kezekti tonaý barysynda qolǵa túsirdi. Onyń buǵan deıin de qaraqshylyq shabýyl men tonaýǵa qatysty zań aldynda jaýaptalǵany anyqtaldy.
Qazirgi kezde 4 epızod boıynsha qylmystyq is qozǵalyp, tergeý amaldary júrgizilýde.
Osyǵan deıin áriptesin uryp óltirgen JShS qyzmetkeri týraly jazdyq.
