Oralda áıelder men balalarǵa kórsetiletin medıtsınalyq qyzmettiń ózekti máseleleri talqylandy
ORAL. 2 qazan. QazAqparat - Batys Qazaqstan oblystyq máslıhatynyń úlken zalynda «Áıelder men balalarǵa kórsetiletin medıtsınalyq qyzmettiń ózekti máseleleri» taqyrybynda keńeıtilgen konferentsııa ótkizildi.
Oblystyq densaýlyq saqtaý basqarmasynyń baspasóz qyzmetinen habarlaǵanyndaı, konferentsııa jumysyna birinshi basshylardyń medıtsınalyq kómekti uıymdastyrý boıynsha orynbasarlary, dáriger akýsher-gınekologtar, jalpy tájirıbe dárigerleri, otbasylyq densaýlyq ortalyqtarynyń meńgerýshileri, densaýlyq saqtaý basqarmasynyń shtattan tys bas mamandary qatysty.
Jıynda áıel turǵyndardy, ásirese, bala týýǵa qabiletti jastaǵylardy dıspanserızatsııalaý máselesi talqylandy. Konferentsııaǵa qatysýshylar QR DSM-niń 2012 jylǵy 3 shildedegi «Bala týýǵa qabiletti jastaǵy áıelderdi dıspanserızatsııalaý» týraly №452 buıryǵyn tıimdi engizý qajettigi týraly toqtamǵa keldi.
Konferentsııada jasóspirim qyzdardyń reprodýktıvti densaýlyǵy, tumaýǵa qarsy júkti áıelderge vaktsınatsııa júrgizý, aldyn ala dıagnoz qoıý, túptep kelgende, áıelder men balalardyń densaýlyǵyn nyǵaıtý, ana men sábıdiń ólim-jitimine jol bermeýge basa nazar aýdaryldy.
Jıynǵa qatysýshylar akýsherlik-gınekologııalyq qyzmetti uıymdastyrý boıynsha óz bilim-bilikterin jetildirdi.
