Oralda áıel tik jardan qulap ketti
ORAL. QazAqparat – Oralda áıel tik jardan qulap, aıaǵyn syndyryp aldy, dep habarlaıdy QazAqparat tilshisi.
BQO TJ departamenti jedel qutqarý jasaǵynyń bas qutqarýshy-psıhology Leıla Ábdirahmanovanyń aıtýynsha, oqıǵa 20 shilde kúni Jaıyq ózeni jaǵalaýynda, Komıntern kenti tusynda oryn aldy.
1988 jylǵy áıel sýǵa shomylý kezinde tik jardan qulaǵan. Sol mańda kezekshilikte júrgen eriktiler qutqarýshylardy shaqyrǵan.
Oqıǵa ornyna kelgen №1 jedel qutqarý jasaǵynyń qutqarýshylary bıik jardyń qasynda jatqan áıeldi kórgen. Oǵan barý qıyn bolǵandyqtan ári aıaǵy synǵandyqtan, áıeldi qaıyqpen tasymaldaýǵa týra kelgen. Qutqarýshy-medıtsına qyzmetkeri Aqylbek Saıynov alǵashqy járdem kórsetip, qandy toqtatqan.
Sodan keıin qutqarýshylar áıeldi jaǵaǵa alyp shyǵyp, jedel járdem brıgadasyna tapsyrdy.
Eske sala keteıik, budan buryn Oralda er adamnyń shuńqyrǵa qulap ketkenin jazǵan bolatynbyz.
