Oralda aıaz kúni oqýshyny avtobýstan túsirip ketken kondýktor jumystan shyǵaryldy
ORAL. QazAqparat - Oralda balany aıazda avtobýstan túsirip ketken kondýktor jumystan shyǵaryldy, dep habarlaıdy QazAqparat tilshisi.
Oqıǵa 23 qańtar kúni keshkisin Zachagan kentine qarasty «Arman» shaǵynaýdanynda oryn aldy.
№10 mekteptiń 3-synyp oqýshysy Erasyl Rızokov №2 baǵytpen júretin avtobýsqa sabaq bitkennen keıin saǵat 18.15 shamasynda mingen. Qaltasynda jolaqyǵa aqshasy bolmaı qalǵan balany kondýktor aıaldamadan túsirip ketken. Ókinishke qaraı, oqýshyǵa eshkim arasha túspegen, kómek qolyn sozbaǵan (balalar úshin jolaqy - 40 teńge). Qarańǵy túsip ketkendikten, bala úılerdi jobalap júre bergen. Aqyry óz úıin tapqan. Bul kezde ony ata-anasy mektepten, muǵalimder men oqýshylardan surap, sabylyp izdep jatqan edi.
Erasyldyń anasy Sandýǵash Shoıynjanovanyń aıtýynsha, uly saǵat shamamen 19:30-da úıge kelgen. Ábden qorqyp, jylaǵan bala ne bolǵanyn ázer túsindirgen. Kondýktor túsirip tastaǵannan keıin ol jeti aıaldama boıy jaıaý júrgen.
Oqıǵa týraly jergilikti BAQ jazǵannan keıin «ÝralTehServıs» JShS basshylyǵy qyzmettik tekserý júrgizdi.
«Qazirgi kezde kondýktordyń kim ekendigi anyqtaldy. Er adam óziniń kinásin moıyndady. Jolaýshy tasymaldaýshy kásiporyn basshylyǵy atalǵan qyzmetkerdi jumysynan bosatý týraly buıryq shyǵardy. Anasynyń sózine qaraǵanda, balanyń jaǵdaıy qazir qalypty», dep habarlady QazAqparat tilshisine qala ákimdiginen.
