Oralda avtoturaqtan tabylǵan er adamnyń ólimi boıynsha kúdikti ustaldy
ORAL. QazAqparat - 22 mamyr kúni saǵat 08.40-ta «Omega» zaýyty aýdanyndaǵy M.Shamov kóshesindegi avtoturaq janynan er adamnyń múrdesi tabyldy, dep habarlaıdy «QazAqparat» tilshisi.
Oral qalalyq ishki ister basqarmasynyń baspasóz qyzmetinen túsken málimetke qaraǵanda, marqum 1956 jylǵy, esh jerde jumys jasamaǵan Oral qalasynyń turǵyny. Sot-medıtsınalyq saraptama nátıjesinde onyń ish qýysyna alǵan jaraqattan ajal qushqany belgili boldy. Kóp uzamaı kúdikti retinde 1967 jylǵy S. degen azamat ustalyp, ýaqytsha ustaý oqshaýlaǵyshyna qamaldy.
Málim bolǵanyndaı, ózara tanys tórt adam qosylyp, ishimdik ishken. Sonyń barysynda jábirlenýshimen sózge kelgen S. oǵan ishinen aýyr soqqy jasaǵan. «Ólip qalady dep oılaǵan joqpyn», - deıdi kúdikti óz jaýabynda. Marqum esin jııa almastan, oqıǵa ornynda kóz jumǵan.
Qazirgi kezde QR QK 106-baby 3-bólimine sáıkes (Densaýlyqqa qasaqana aýyr dene jaraqatyn keltirý) tergeý amaldary júrgizilýde. Qalǵan ekeýi kýáger retinde jaýap berýde.
