Oralda avtokólik órtenip, júrgizýshi kúıik jaraqatyn aldy

ORAL. KAZINFORM – Oral qalasynda avtokólik órtenip ketti. 

BQO TJ departamenti baspasóz qyzmetiniń habarlaýynsha, oqıǵa 31 jeltoqsan kúni Zachagan kentinde bolǵan.

- Jáńgir han kóshesi 35/2-mekenjaıynda «Berkýt» avtogaz quıý stantsııasy aýmaǵynda Kia Rio avtokóligi otqa orandy. Órt saǵat 15.21-de oqshaýlanyp, 15.28-de sóndirildi. Oqıǵa ornyna 12 adam 3 tehnıkamen bardy. Zardap shekken júrgizýshi aýrýhanaǵa jetkizildi, - dep habarlady vedomstvodan.

BQO densaýlyq saqtaý basqarmasy baspasóz qyzmetiniń naqtylaýynsha, denesiniń 20 paıyzyn kúıik shalǵan 1987 jylǵy er adam qalalyq kópbeıindi aýrýhananyń polıtravma bólimshesine jatqyzyldy. Jaǵdaıy - ortasha dárejede aýyr. Qazirgi kezde qajetti emin alyp jatyr.

Eske sala keteıik, budan buryn Oralda órt qaýipsizdigi talaptaryn buzǵan kompanııaǵa aıyppul salynǵanyn jazǵan bolatynbyz.