Oralda avtokólik órtenip, 16 jastaǵy jasóspirim kúıik jaraqatyn aldy
ORAL. KAZINFORM — Oral qalasynda «Aıajan» saýda úıi janynda «Lada Granta» avtokóligi otqa orandy.
Saldarynan jalyn ekinshi avtokólikti sharpyǵan. Turǵyndardyń sózine qaraǵanda, jasóspirim «Lada Grantadan» shyǵyp úlgerip, aman qalǵan.
BQO TJD baspasóz qyzmetinen málim etkenindeı, oqıǵa 10 sáýir kúni keshkisin bolyp, eki jeńil avtokólik órtendi.
- Oqıǵa ornynda «Lada Granta» avtokóliginde bolǵan 2010 jylǵy jasópirim 9 paıyz kúıik jaraqatyn aldy. Ol oblystyq kópbeıindi balalar aýrýhanasyna jatqyzyldy. Órt tolyqtaı sóndirildi, - dep habarlady vedomstvodan.
BQO densaýlyq saqtaý basqarmasy baspasóz qyzmetiniń naqtylaýynsha, dárigerler travmatologııa bólimine túsken, oń jaq baltyryn jalyn sharpyǵan jasóspirimge ІІ-ІІІa dárejeli termııalyq kúıik dıagnozyn qoıǵan. Kúıik kólemi – shamamen 8 paıyz.
Qazirgi tańda naýqastyń jaǵdaıy ortasha aýyrlyqta dep baǵalanyp otyr. Jasóspirim barlyq qajetti medıtsınalyq kómekti alyp jatyr: kúndelikti tańý júrgizilýde, aýyrsynýdy basatyn jáne antıbakterıaldy em taǵaıyndalǵan. Patsıent dárigerlerdiń baqylaýynda, jaǵdaıy turaqty.
Eske sala keteıik, budan buryn Batys Qazaqstanda dalada 7 janý oqıǵasy tirkelgenin jazǵan bolatynbyz.
