Oralda avtokólik qaǵyp ketken jigit jansaqtaý bóliminde jatyr

ORAL. QazAqparat  - Oralda avtokólik qaǵyp ketken jigit jansaqtaý bóliminde jatyr, dep habarlaıdy QazAqparat tilshisi.

Oqıǵa 8 maýsym kúni bolǵan. «Toyota Camry» avtokóliginiń S.Tıýlenın kóshesi boıyndaǵy avtobazar tusynda jaıaý júrginshini qaǵyp ketkeni beınebaqylaý kamerasyna túsip qalǵan.

Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, jedel járdem saǵat 13.39-da shaqyrylǵan. Jedel járdem kóligi 13.43-te jetken. 1997 jylǵy turǵyn basynan jaraqat alǵan ári mıy shaıqalǵan.

«Qazirgi kezde jigit qalalyq kópbeıindi aýrýhananyń jansaqtaý bóliminde jatyr. Esi áli kirgen joq, jaǵdaıy aýyr»,- dedi A.Saqposynova.

Atalǵan derek boıynsha QR QK 345-baby 2-bóligine sáıkes (aýyr dene jaraqatyn keltirgen jol júrý erejesin buzý) sotqa deıingi tergeý amaldary júrgizilýde.