Oralda avtokólik qaǵyp ketken velosıped mingen er adam aýrýhanaǵa jetkizildi
ORAL. QazAqparat – Oralda avtokólik qaǵyp ketken velosıped mingen er adam aýrýhanaǵa jetkizildi, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkendeı, oqıǵa 14 maýsym kúni Petrovskıı men Belger kósheleriniń qıylysynda boldy.
Saǵat shamamen 16.17-de 1992 jylǵy júrgizýshi «Folksvagen Passat» avtokóligimen jol qozǵalysy qaýipsizdigin qamtamasyz etpeı, velosıpedshini qaǵyp ketken.
Oqıǵa ornynda polıtsııa qyzmetkerleri jumys jasady.
Oblystyq densaýlyq saqtaý basqarmasynyń baspasóz qyzmeti naqtylaǵanyndaı, jedel járdem saǵat 16.18-de shaqyrylyp, brıgada bes mınýttan keıin jetken.
Aldyn ala málimet boıynsha velosıpedpen júrgen 1985 jylǵy er adam jabyq bas-mı jaraqatyn alyp, mıy shaıqalǵan degen kúdikpen qalalyq kópbeıindi aýrýhanaǵa jetkizildi.
Qazirgi kezde oqıǵanyń jaı-japsary anyqtalý ústinde.
Eske sala keteıik, budan buryn Oralda avtokóliktiń áıel adamdy qaǵyp ketkenin, polıtsııa qyzmetkeriniń mas kúıinde jol apatyna ushyraǵanyn jazǵan bolatynbyz.
Sondaı-aq Batys Qazaqstanda avtokólik aýdarylyp, júrgizýshi mert boldy.
