Oralda avtokólik qaǵyp ketken 72 jastaǵy keıýana kóz jumdy
BQO polıtsııa departamenti baspasóz qyzmetinen túsken málimetke qaraǵanda, birinshi oqıǵa 20 shilde kúni saǵat 08.10-da H.Dospanova men 8 naýryz kósheleriniń qıylysynda boldy.
«Kıa Rıo» avtokóliginiń júrgizýshisi burylar sátte jol bermeı, «Kavasakı» mototsıklimen túıisken. Avtokólikte 1993 jylǵy júrgizýshi men eki jasar bala bolǵan.
Oqıǵa saldarynan 32 jastaǵy mototsıklshi men eki jasar bala jaraqat pýnktine júgindi.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, oblystyq balalar aýrýhanasyna jetkizilgen 2020 jylǵy bala aldyn ala dıagnoz boıynsha bas pen mıdyń jabyq jaraqatyn alǵan.
1990 jylǵy er adamnyń bas pen mıdyń jabyq jaraqatyna qosa mıy shaıqalǵan. Ol oblystyq aýrýhanada jatyr.
Polıtsııa departamentiniń málimeti boıynsha keshe túnde taǵy bir júrgizýshi «Hýndaı Aktsent» avtokóligimen N.Nazarbaev dańǵylymen kele jatyp, J.Moldaǵalıev kóshesimen qıylysar tusta retteletin jaıaý júrginshi ótkelinde 22 jastaǵy qyzdy qaǵyp ketti.
Aldyn ala málimet boıynsha bas pen mıdyń jabyq jaraqatyn alǵan. Júrgizýshi medıtsınalyq kýálandyrýǵa sáıkes ishimdik ishpegen.
Sonymen qatar 20 shilde kúni shamamen saǵat 19.40-ta 1988 jylǵy júrgizýshi VAZ-210740 avtokóligimen Karbyshev kóshesi boıynda belgilenbegen jerden ótip bara jatqan 1950 jylǵy áıeldi qaǵyp ketti. Jol apaty saldarynan áıel kóz jumdy» dep habarlady vedomstvodan.
Oblystyq densaýlyq saqtaý basqarmasy ekinshi oqıǵa boıynsha jedel járdemniń saǵat 23.29-da shaqyrylǵanyn jetkizdi. Oblystyq aýrýhanada jatqan qyzdyń jambasy da synǵan.
Eske sala keteıik, budan buryn Oralda jol apatynan 8 adamnyń qaza tabýy boıynsha qylmystyq is qozǵalǵanyn jazǵan bolatynbyz.