Oralda avtokólik dońǵalaqtaryn paıdaǵa asyratyn zaýyt iske qosylmaq
ORAL. QazAqparat - Oralda avtokólik dońǵalaqtaryn paıdaǵa asyratyn zaýytty iske qosý kózdelýde, dep habarlaıdy «QazAqparat» tilshisi.
«Avtokombınat» JShS dırektory Valerıı Goloýhovtyń málim etkenindeı, Elbasynyń bıylǵy Joldaýynda ekologııa máselelerine de erekshe mán berilgeni belgili. Osy oraıda avtokombınat bazasynda jabdyqtar alyndy. Jańa kásiporyn jylyna 2 myń tonnadaı dońǵalaq tystaryn óńdeıtin bolady. Bul - qazirgi kezde asa qajetti, kúrdeli óndiris. Aldaǵy aqpan aıynyń basynda zaýytty iske qosý josparlanýda. Bul, árıne, jańa jumys oryndaryn ashýǵa múmkindik beredi.
Jalpy, «Avtokombınat» JShS san salaly qyzmetti atqarady. Mysaly, Joldaýǵa sáıkes aýyl sharýashylyǵynda ınnovatsııalyq jańalyqtardy engizbese bolmaıdy. Sondyqtan avtokombınat quramyna kiretin aýyl sharýashylyǵy kásipornynda barlyq tehnıkalar túgeldeı aýystyryldy. Oblysta birinshi bolyp qurǵaq sýarý ádisi jolǵa qoıyldy. Bul tájirıbeni reseılik ǵalymdar qoldap, óńirdegi basqa sharýashylyqtar engizýde. Sonyń nátıjesinde Batys Qazaqstan qurǵaqshylyq jıi oryn alatyn óńirge jatatynyna qaramastan, 2016-2017 jyldary egin sharýashylyǵynda jaqsy ónim alyndy. Eńbek ónimdiligi jóninen kásiporyn Germanııa, Anglııa sııaqty elderdegi deńgeıge jeteqabyl deýge bolady.
Joldaýda sondaı-aq tehnıkalyq qaıta jaraqtandyrý men logıstıkany damytýǵa aıryqsha nazar aýdaryldy. Bul rette Astana men Oral qalasynda úlken júk kólikterine qyzmet kórsetetin «Daf» kólik-logıstıkalyq ortalyqtary jumys jasaýda. Bir jyl buryn osy ortalyqtar qyzmetin kórgen Gollandııadan kelgen «Daf» kontserniniń ókilderi muny birden quptap, yntymaqtastyq pen dılerlik jónindegi kelisimge qol qoıdy.
«Kásipkerlerge memleket tarapynan únemi qoldaý kórsetilip keledi. Mysaly, bizder Astanadaǵy kólik-logıstıkalyq ortalyq qurylysy úshin bes jylǵa nesıe alyp, tolyq eseptestik. Aýyl sharýashylyǵynda jańa tehnıka, gerbıtsıdter men tyńaıtqyshtar, janar-jaǵar maı alýǵa demeýqarjy berilýde. Osyndaı qoldaý-kómektiń arqasynda qaı salada da isimizdi alǵa bastyryp, zamanaýı ozyq tehnologııalardy engize bilsek, maqsatymyzdyń oryndalǵany», dedi «QazAqparat» tilshisine Valerıı Goloýhov.
Eske sala keteıik, Oralǵa qarasty Zachagan kentinde «BASK» kólik-logıstıkalyq ortalyǵy da salynýda. Onda aldymen avtokólik ıeleri úshin arnaıy qyzmet kórsetý ortalyǵy ashylatyn bolady.
