Oralda avtogaz quıý stantsııalarynda uzyn-sonar kezek tyıylmaı tur
ORAL. KAZINFORM — Oral qalasynda júrgizýshilerdiń avtogaz quıý stantsııalarynda saǵattap kezekke turatyny jóninde shaǵym jasaýy jıiledi.
Oral qalasynyń turǵyny Bolat Іzbasarovtyń Kazinform tilshisine málim etkenindeı, júrgizýshiler kezekke úsh-tórt saǵat boıy turýǵa májbúr.
— Ótken aıdyń basynan 15 qazanǵa deıin suıytylǵan munaı gazy boldy. Al 15 qazannan beri jarty aıdan asty, kúnde osy. Gaz tapshylyǵy buryn da boldy ǵoı, biraq dál mundaı emes edi. Zachagan kentindegi osy stantsııaǵa kezekke turǵan júz shaqty kólik «Jáńgir han» saýda úıine deıin tizilip tur. Basqa da stantsııalarda jaǵdaı osyndaı. Kezegimiz jetkende, gaz bitip qalady. Ózimiz munaı, gaz óndiretin ólkede otyrsaq ta, másele esh sheshiler emes, — dedi Bolat Іzbasarov.
Osyǵan oraı arnaıy joldanǵan saýalǵa BQO energetıka jáne turǵyn úı-kommýnaldyq sharýashylyq basqarmasy jaýap berdi.
Basqarma málimetine qaraǵanda, bıylǵy 4 toqsandaǵy jetkizý josparyna sáıkes qarasha aıynda «Jaıyqmunaı» JShS-dan oblysqa 3 785 tonna suıytylǵan munaı gazy qarastyrylǵan.
— 2 qarashaǵa deıin sonyń 321 tonnasy jóneltildi, bul — jospardyń 8,5 paıyzy. 3 qarasha kúni taǵy 170 tonna gaz jetkizilmekshi. Qazirgi ýaqytta 40 avtogaz quıý stantsııasynda satý shekteýsiz júrgizilip jatyr (beketterde qor azaıǵandyqtan, kólemder kelgenge deıin ýaqytsha shekteýler engiziledi). Al 64 avtogaz quıý stantsııasynda suıytylǵan munaı gazyn satýǵa shekteý qoıyldy. Aptanyń aıaǵynda jaǵdaı turaqtalady dep kútilýde. Shekti bólshek saýda baǵasy — lıtrine 85 teńgeden, 200 kılometrden astam qashyqtyqtaǵy shalǵaı aýdandar úshin — 90 teńge, — dep habarlady vedomstvodan.
Eske sala keteıik, budan buryn Batys Qazaqstanda suıytylǵan gaz tapshylyǵy nelikten baıqalyp otyrǵanyn jazǵan edik.
Sondaı-aq Energetıka mınıstrligi benzın men gaz baǵasyna qatysty shaǵymdardy qabyldaıtyn jeli ashty.