Oralda avtobýstaǵy jappaı tóbeleske baılanysty qylmystyq is qozǵaldy
ORAL. KAZINFORM — Oralda adamdardyń avtobýsta tóbeleskeni týraly áleýmettik jelide aqparat tarady.
Turǵyndardyń sózine qaraǵanda, MyFest festıvaline qatysýshylar kórermenderdi tasý úshin shyǵarylǵan avtobýstyń ishindegi tóbeleske kýá bolǵan.
Aldymen er adam men áıel janjal shyǵarǵan. Janjal barysynda olardyń bireýi salondaǵy jigitke qatysty burysh ballonyn qoldanǵan. Saldarynan jábirlenýshi eki kózinen kúıik jaraqatyn alǵan.
Budan keıin basqa jolaýshylar araǵa kıligip, ol jappaı tóbeleske ulasqan. Jolaýshylardyń keıbiri osy kezde án salyp otyrǵan.
BQO polıtsııa departamentiniń baspasóz qyzmetinen túsken málimetke qaraǵanda, atalǵan oqıǵaǵa qatysty qylmystyq is qozǵaldy.
Janjalǵa qatysqandardyń barlyǵy anyqtaldy. Olardyń bireýi ýaqytsha ustaý ızolıatoryna qamaldy.
— Qazirgi kezde oqıǵanyń tolyq mán-jaıyn anyqtaý maqsatynda qajetti tergeý amaldary júrgizilýde. Tergeý qorytyndysyna sáıkes kináliler jaýapqa tartylatyn bolady, — dep habarlady vedomstvodan.
Eske sala keteıik, budan buryn Oralda 8 jasar balanyń ólimine qatysty tergeý júrgizilip jatqanyn jazǵan bolatynbyz.