Oralda avtobýsqa qatysty taǵy bir jol oqıǵasy tirkeldi
ORAL. QazAqparat - Keshe túste «KamAZ» júk kóligi «Orbıta» dúkeni mańyndaǵy aıaldamada adamdardy túsirip jatqan №4 baǵytta qatynaıtyn avtobýsty artynan kelip, túıgen, dep habarlaıdy «QazAqparat» tilshisi.
Oblystyq ІІD jergilikti polıtsııa qyzmetiniń basshysy, polıtsııa polkovnıgi Manarbek Ǵabdýllınniń aıtýynsha, bul jerde kináli - «KamAZ» avtokóliginiń júrgizýshisi. Degenmen adamdar asa kóp zardap shekpegen. Sondyqtan bul jol-kólik oqıǵasy boıynsha júrgizýshi ákimshilik jaýapkershilikke tartylatyn bolady.
BQO densaýlyq saqtaý basqarmasy basshysynyń orynbasary Nurdanat Berkinǵalıdyń aıtýynsha, barlyǵy 7 adam medıtsınalyq kómekke júgingen, olardyń bireýi - bala. Oblystyq klınıkalyq aýrýhanada qaralǵannan keıin bári de ambýlatorlyq em qabyldaý úshin úılerine jiberilgen.
Eske sala keteıik, 24 tamyz kúni Oralda №7 avtobýs №5 baǵytta júretin avtobýstyń artynan túıgen bolatyn. Budan zardap shekkenderdiń qatary qazirgi tańda 75-ke jetip otyr. Kúni búgin qalalyq kópbeıindi aýrýhanada bireýi, oblystyq klınıkalyq aýrýhanada taǵy bireýi emdelýde, qalǵandary úılerine shyǵarylǵan.
