Oralda avtobýs qaǵyp ketken jaıaý júrginshi jansaqtaý bólimine tústi
BQO polıtsııa departamentiniń baspasóz qyzmeti málim etkenindeı, oqıǵa 16 tamyz kúni Jáńgir han kóshesi boıynda «Oktan» janar-jaǵarmaı quıý stansasy mańynda boldy.
№3 baǵytpen júretin «DAEWOO» avtobýsynyń 31 jastaǵy júrgizýshisi jol qaýipsizdigin qamtamasyz etpeı, rettelmeıtin jaıaý júrginshi jolymen ótip bara jatqan 1986 jylǵy áıel adamdy qaǵyp ketken.
Sonyń saldarynan jaraqat alǵan áıel adam oblystyq kópbeıindi aýrýhananyń jaraqat pýnktine jetkizildi. Medıtsınalyq kómek kórsetilgennen keıin ol jansaqtaý bólimine jatqyzyldy.
Avtobýs arnaıy turaqqa qoıyldy.
Qazirgi kezde QR QK 345-baby 1-bóligine sáıkes sotqa deıingi tergeý amaldary júrgizilýde.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, jansaqtaý bóliminde jatqan áıel adamnyń jaǵdaıy óte aýyr.
Eske sala keteıik, Oralda Toıota kóligi býtıkke soǵylyp, júrgizýshi jaraqat alǵanyn jazǵan bolatynbyz.