Oralda avtobýs qaǵyp ketken 58 jastaǵy áıel kóz jumdy
BQO polıtsııa departamentiniń baspasóz qyzmetinen málim etkenindeı, oqıǵa 1 mamyr kúni túste boldy.
«Shamamen saǵat 13.00-de 1970 jylǵy júrgizýshi №19 baǵytpen júretin avtobýspen kele jatyp, Qurmanǵazy kóshesindegi «Bıbigúl» kafesi tusyndaǵy aıaldamada «Toıota Kamrı» avtokóligimen soqtyǵysqan. Sodan rýlge ıe bola almaı, 1965 jylǵy jaıaý júrginshini qaǵyp ketti. Jol apaty saldarynan áıel aýrýhanada qaıtys boldy. Sondaı-aq avtobýstyń eki jolaýshysy aýrýhanaǵa jetkizildi. Atalǵan derek boıynsha QR QK 345-baby 3-bóligine sáıkes sotqa deıingi tergeý amaldary júrgizilýde. Qazirgi kezde oqıǵanyń jaı-japsary anyqtalyp jatyr», dep habarlady vedomstvodan.
Eske sala keteıik, budan buryn Aqsaı qalasynda tapanshadan oq atylyp, polıtsııa qylmystyq is qozǵaǵanyn jazǵan bolatynbyz.
