Oralda avarııalyq-kommýnaldyq qyzmet boıynsha biryńǵaı júıe engiziledi
Bul jobany shet elderdiń tájirıbesin qoldana otyryp, Oral qalasy ákimdigi men oblystyq aqparattandyrý, memlekettik kórsetiletin qyzmetter jáne arhıvter basqarmasy birlesip júzege asyrýda.
Joba «Oral qalasynyń avarııalyq-kommýnaldyq qyzmeti boıynsha qalalyq biryńǵaı 109 Sall-ortalyǵy» dep atalady. Bul joba AQSh-taǵy «311» qyzmetine negizdelgen, qaladaǵy avarııalyq-kommýnaldyq qyzmetterdi (gaz, sý, jylý, elektr, turǵyn úı-kommýnaldyq sharýashylyǵy, qatty turmystyq qaldyqtar jáne basqa) biriktiredi. Pılottyq jobany bıylǵy jyldyń birinshi toqsanynda iske qosý josparlanýda. Mundaǵy basty maqsat - turǵyndar men qala qonaqtarynyń kommýnaldyq máselelerin jedel sheshý.
Qazirgi tańda turǵyndar avarııalyq-kommýnaldyq máselelerdi sheshý úshin ár mekemege bólek qońyraý shalady, bul yńǵaısyz ári tıimsiz. Joba engizilgen kezde turǵynnyń kommýnaldyq qyzmet mekemelerine qońyraý shalýǵa ketetin ýaqyty únemdelip, máselesin barynsha jyldam sheshýge múmkindik alatyn bolady.
«Kúni búgin joba jasaqtalyp, operatorlar oqytylyp jatyr. Sondaı-aq jumys orny jabdyqtalýda. Operatorlar Smart Uralsk ǵımaratynyń birinshi qabatynda ornalasatyn bolady», - dep habarlady QazAqparat tilshisine oblystyq aqparattandyrý, memlekettik kórsetiletin qyzmetter jáne arhıvter basqarmasynan.
