Oralda aýyr qylmys jasap, qashyp júrgen ózbekstandyq azamat ustaldy
ORAL. QazAqparat – Batys Qazaqstan oblysynda respýblıkalyq «Mıgrant» jedel aldyn alý sharasy barysynda bes qylmysker ustaldy, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, 15-19 aqpan aralyǵynda ótkizilgen atalmysh is-shara kezinde qolǵa túsken 5 qylmyskerdiń bireýi halyqaralyq izdeýde júrgen bolyp shyqty.
«Oralda aýyr qylmys jasap, sottan boı tasalaǵan 35 jastaǵy ózbekstandyq azamat ustaldy. Sondaı-aq oblysta zańsyz júrgen 15 sheteldik el aýmaǵynan shyǵaryldy», dedi B.Belgibekov.
Polıtsııanyń jedel toptary oblys aýmaǵynda júrgen myńnan astam sheteldik azamatty tekserdi.
Sonyń nátıjesinde elde júrip-turý merzimin buzǵan 119 adam, sheteldiktiń kelýine baılanysty qujat jasamaǵan 96 oblys turǵyny jáne sheteldik jumys kúshin zańsyz tartqan 5 jumys berýshi anyqtalyp, bári de ákimshilik jaýapkershilikke tartyldy.
Eske sala keteıik, budan buryn Oralda polıtsııa qyzmetkeriniń 70 myń teńge para alý kezinde ustalǵanyn jazǵan bolatynbyz.
