Oralda aýyl sharýashylyǵy ónimderiniń jármeńkesi ótti
ORAL. QazAqparat - Búgin Oralda M.Yqsanov kóshesi boıynda aýyl sharýashylyǵy ónimderiniń jármeńkesi ótti, dep habarlaıdy «QazAqparat» tilshisi.
Oǵan Qaratóbe, Terekti, Bórli jáne Tasqala aýdandarynan kelgen aýyl sharýashylyǵy taýaryn óndirýshiler, sondaı-aq qala kásipkerleri qatysyp, óz ónimderin usyndy.
Oblys ákiminiń orynbasary Ǵabıdolla Ospanqulovtyń aıtýynsha, jármeńkedegi taýarlar baǵasy bazardaǵydan 10-20 paıyzǵa arzan. Turǵyndardyń ótinishine sáıkes bıyl alǵashqy jármeńke 3 naýryz kúni uıymdastyrylsa, budan keıin 17 naýryz kúni de jalǵasady.
Oral qalasynyń ákimi Murat Muqaevtyń sózine qaraǵanda, ótken jyly oblys ortalyǵynda 50-ge jýyq jármeńke ótip, baǵany turaqtandyrýǵa septigin tıgizdi. Mysaly, kúzde basqa aımaqtarda kartoptyń baǵasy 150 teńgege deıin barsa, Oralda 100 teńgeden asqan joq. Kúni búgin turaqtandyrý qoryndaǵy 1 300 tonna kartoptyń 300 tonnasy jumsaldy.
3 naýryz kúni de, búgin de, ásirese, etke degen suranys mol boldy. Jármeńkede sıyr eti 1 300, jylqy eti 1 400 (bazarda ekeýiniń de baǵasy 1800 teńge shamasynda), jumyrtqa 210 (260), kartop 90 teńgeden satyldy.
Oral qalasy aýyl sharýashylyǵy bóliminiń basshysy Mahambet Batyrǵalıevtiń málim etkenindeı, basqa ónimderdi aıtpaǵanda, jármeńkege barlyǵy 34 iri qara, 14 jylqy eti, 3,5 tonna kartop, 18 myń dana jumyrtqa ákelindi. Ótken senbidegi jármeńkede de osyndaı kólemde ónimder satylǵan edi.
Aıta keteıik, taýar ótkizýshilerge saýda oryndary tegin berildi.
