Oralda «AUYL FEST. Qoı sharýashylyǵy – 2025» halyqaralyq forýmy bastaldy
ORAL. KAZINFORM – Búgin Oral qalasynda aýyl sharýashylyǵy salasyndaǵy mańyzdy oqıǵalardyń biri – «AUYL FEST. Qoı sharýashylyǵy – 2025» tuńǵysh Halyqaralyq forýmy jumysyn bastady.
Forýmnyń ashylý saltanatyna Batys Qazaqstan oblysynyń ákimi Narıman Tóreǵalıev, Májilistegi Agrarlyq komıtettiń tóraǵasy, «Aýyl» partııasynyń tóraǵasy Serik Egizbaev, Premer-Mınıstrdiń keńesshisi Eraly Toǵjanov, Májilis depýtaty Qaraqat Ábden, Aýyl sharýashylyǵy vıtse-mınıstri Amanǵalı Berdalın jáne mınıstrlik ókilderi qatysty.
Atalmysh basqosýǵa otandyq sarapshylarmen qatar Reseı Federatsııasy, Qytaı Halyq Respýblıkasy, Vengrııa, Frantsııa jáne Iran Islam Respýblıkasynan kelgen halyqaralyq qonaqtar, ǵalymdar men aýyl sharýashylyǵy salasynyń mamandary da keldi.
Forým aıasynda qoı sharýashylyǵy ónimderiniń sapasyn arttyrý, jańa tehnologııalardy engizý, mal sharýashylyǵyndaǵy ınnovatsııalyq tásilder, ekologııalyq turaqtylyq pen eksporttyq áleýetti keńeıtý baǵyttary keńinen talqylanady.
– Memleket basshysy Qasym-Jomart Toqaev aýyldyń áleýetin arttyrýǵa erekshe nazar aýdaryp keledi jáne ol 2025 jyldy «Jumysshy mamandyqtary jyly»dep jarııalaǵan bolatyn. Bul bastama – eńbek adamynyń mártebesin kóterip, naqty óndiris pen kásiptik-tehnıkalyq bilim berý salasyna jańa serpin berýge baǵyttalǵan mańyzdy qadam, - dedi oblys ákimi Narıman Tóreǵalıev.
Sondaı-aq «AUYL FEST. Qoı sharýashylyǵy – 2025» halyqaralyq forýmynda ǵylymı-praktıkalyq konferentsııalar, kórmeler, tájirıbe almasý alańdary uıymdastyrylady dep josparlanyp otyr.
Aıta keteıik, aıtýly sharanyń basty maqsaty – aýyl sharýashylyǵy salasyndaǵy yntymaqtastyqty nyǵaıtý, zamanaýı tehnologııalardy engizý arqyly otandyq qoı sharýashylyǵynyń básekege qabilettiligin arttyrý.