Oralda aýrýhana kóz jumǵan naýqastyń otbasyna 3 mln teńge ótemaqy tóleıdi
ASTANA. KAZINFORM — 2022 jyldyń naýryz aıynyń sońynda 45 jastaǵy áıel Oral qalasynyń aýrýhanasyna jedel járdem kóligimen jedel juqpaly aýrýmen túsken, dep habarlaıdy Joǵarǵy sottyń baspasóz qyzmeti.
Emdelgenine qaramastan jaǵdaıy nasharlap, bir aptadan keıin qaıtys bolǵan. Qaıǵyly oqıǵadan keıin marqumnyń anasy men ápkesi oblystyq densaýlyq saqtaý basqarmasy men aýrýhananyń ústinen moraldyq shyǵyndy birlesip óndirip alýdy surap, sotqa shaǵym túsirgen. Olar talap qoıýda jaqyndarynyń ólimine medıtsına qyzmetkerleriniń qyzmettik mindetterin oryndaýdaǵy salǵyrttyǵy men medıtsınalyq kómek kórsetý normalaryn buzýynyń saldary sebep bolǵanyn kórsetken. Talap qoıýshylar qyzy men ápkesinen aıyrylý olar úshin aýyr psıhologııalyq kúızelis bolǵanyn atap kórsetken. Úsh jyl ótse de, olar aýyr psıhıkalyq, fızıkalyq jáne emotsıonaldyq azapty bastan keshirip jatyr.
Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń departamenti júrgizgen tekserý nátıjesinde naýqasty dıagnostıkalaý, emdeý, baqylaýda kóptegen zańbuzýshylyq anyqtaldy. Atap aıtqanda, emdeýshi dáriger medıtsınalyq kómek kórsetý standarttarynan aýytqyǵan, kásibı mindetterin durys oryndamaǵan, sondaı-aq medıtsınalyq qujattardy burmalaǵan. Ákimshilik quqyq buzýshylyq isteri jónindegi mamandandyrylǵan sotta ótken sot talqylaýynyń qorytyndysy boıynsha aýrýhananyń úsh dárigeri sapasyz medıtsınalyq qyzmet kórsetkeni úshin ÁQBtK boıynsha tártiptik jaýapkershilikke tartyldy.
— Batys Qazaqstan oblysy Báıterek aýdanynyń No2 soty aýrýhananyń medıtsına qyzmetkerleriniń is-áreketi men naýqastyń ólimi arasyndaǵy tikeleı sebeptik baılanysty anyqtap, sondaı-aq moraldyq zııandy óteý týraly talaptardy negizdi dep tanydy. Іstiń mán-jaıyn eskere otyryp, talap qoıý ishinara qanaǵattandyryldy: aýrýhanadan marqumnyń anasy men ápkesiniń paıdasyna 3 mln-nan astam teńge óndirildi. Sottyń sheshimi zańdy kúshine endi, — delingen habarlamada.
Budan buryn Qostanaıda soqqyǵa jyǵylǵan dáriger sotta 2 mln teńge talap etkenin jazdyq.