Oralda aýyldyq okrýgterge 13 atalym boıynsha qarjylaı sertıfıkat tabystaldy
ORAL. KAZINFORM – Oral qalasynda «Aýyl – el tiregi: damý men seriktestiktiń jańa kezeńi» taqyrybynda aýyl ákimderiniń І oblystyq forýmy ótti.
Plenarlyq otyrysqa oblys ákimi Narıman Tóreǵalıev, QR Memlekettik qyzmet isteri agenttiginiń tóraǵasy Darhan Jazyqbaı jáne óńirdegi atqarýshy jáne ókiletti organdardyń ókilderi qatysty.
Memleket basshysy Qasym-Jomart Toqaev 2025 jyldyń 28 qarashasynda ótken Aýyl ákimderiniń dıalog-platformasynda aýyl ákimderi jumysynyń negizgi baǵyttaryn aıqyndap berdi. Oblys ákimi óz sózinde Prezıdent tapsyrmalarynyń oryndalý barysy men aýyl-aımaqtyń áleýmettik-ekonomıkalyq damýy týraly baıandady.
– Halyqtyń ómir sapasyn arttyrý – basty mindetimiz. Oblysta keıingi 3 jylda salynǵan 30 mekteptiń 22-si aýyldarda boı kóterdi. «Aýylda densaýlyq saqtaýdy jańǵyrtý» ulttyq jobasy aıasynda 50 medıtsınalyq nysan paıdalanýǵa berildi. Barlyq aýdan ortalyqtary dene-shynyqtyrý saýyqtyrý keshenderimen qamtyldy. 25 aýylda kitaphana jańǵyrtylyp, 2 aýdandyq kitaphanaǵa jańa ǵımarat salyndy. Aýdan ortalyqtaryn qospaǵanda aýyldyq eldi mekenderdiń ózinde 1 800-ge jýyq turǵyn úı salyndy, - dedi Narıman Tóreǵalıev.
QR Memlekettik qyzmet isteri agenttiginiń tóraǵasy Darhan Jazyqbaı mundaı jıyndar aýyldyq aýmaqtardy damytýda mańyzdy ekenin aıtty. Ol memlekettik qyzmetshilerge qatysty zań jobasyndaǵy jańashyldyqtarǵa toqtaldy.
– Qujat memlekettik qyzmet modelin jańǵyrtýǵa jáne memlekettik apparattyń tıimdiligin arttyrýǵa baǵyttalǵan. Jańashyldyqtyń biri – mansaptyq ósýdiń jańa tetikteri engiziledi. Memlekettik qyzmetshilerdiń áleýmettik kepildikterin keńeıtý kózdelgen. Atap aıtqanda, artyq jumys ýaqyty úshin ótemaqy tóleý, qosymsha aqyly demalys berý jáne ómirlik jaǵdaılarǵa baılanysty qysqa merzimdi demalys qarastyrylǵan, - dedi Darhan Medeǵalıuly.
Aýyl ákimderi kooperatsııalardy damytý, «Zań men tártip» qaǵıdatyn ilgeriletý jáne taǵy basqa basym baǵyttar boıynsha tájirıbelerin bólisti. Ár saladaǵy úzdik nátıjeler úshin aýyldyq okrýgterge 13 atalym boıynsha 10 mln teńgeden qarjylaı sertıfıkat tabystaldy. Belsendi azamattar, metsenattar, kásipkerler, oblys ákiminiń alǵys hatymen marapattaldy.
