Oralda áýe apatynan qaza tapqan ushqysh jerlendi
ORAL. QazAqparat - Búgin Oralda 3 qazan kúni Almaty oblysynda apatqa ushyraǵan AN-28 ushaǵynda bolǵan batysqazaqstandyq ushqysh Evgenıı Kýtafın jerlendi, dep habarlaıdy «QazAqparat» tilshisi.
Áýe sporty túrleri boıynsha oblystyq balalar-jasóspirimder sport mektebiniń dırektory Ergen Orynbasarovtyń aıtýynsha, bul osy ujym úshin de aýyr qaza boldy. Óıtkeni taıaýda otyzǵa tolǵan Evgenııdiń ózi 2002 jyldan beri osynda parashıýt sportymen aınalysty. Túrli jarystarda oblys, el namysyn qorǵap, júldelerge qol jetkizdi, sport sheberligine úmitker atandy. Tipti azamattyq avıatsııaǵa aýysyp, ushqysh atansa da, bıyl shilde aıynda Almaty qalasynda parashıýt sportynan ótken el chempıonatyna BQO quramasy sapynda qatysyp, qaıtyp edi. Oǵan qosa ákesi, 1962 jylǵy Vıtalıı Kýtafın osy sport mektebinde parashıýt-desant daıyndyǵy jónindegi nusqaýshy retinde qyzmet jasap keledi.
«Marqum jaıly da keremet azamat edi. Artynda áıeli, kishkentaı balasy qaldy. Biz barynsha otbasyna qolushymyzdy berdik. Ujym qyzmetkerleri bir kúndik jalaqylaryn aýdardy. Oblystyq dene shynyqtyrý jáne sport basqarmasy men sport mektepteri tarapynan da osyndaı kómek kórsetilýde. Sonymen qatar áıeli qaladaǵy №3 emhanada jumys jasaıtyndyqtan, emdeý mekemeleri de tys qalǵan joq», dedi E.Orynbasarov.
