Oralda atty polıtsııa vzvody iske kiristi
ORAL. QazAqparat - BQO ishki ister departamentiniń janynan atty vzvod ashylyp, iske kiristi, dep habarlaıdy «QazAqparat» tilshisi.
Departamenttiń baspasóz qyzmetinen túsken málimetke qaraǵanda, saıajaı aýmaqtaryndaǵy qıyn jerlerde qoǵam tynyshtyǵyn saqtaý maqsatynda atty vzvod qurý týraly sheshim 2015 jyldyń jeltoqsan aıynda oblystyq máslıhat sessııasynda qabyldanǵan bolatyn. Bıyl soǵan sáıkes jergilikti bıýdjetten qarjy bólinip, jol-patrýldik polıtsııa batalonynyń atty vzvody úshin kóshim tuqymdas 25 jylqy satyp alyndy. Ár at osy qyzmetke beıim polıtseılerge bekitilip, atqorada ustalady. Polıtsııa qyzmetkerleri sáıgúlikterin baptap ustap, qyzmetke shyǵar aldynda jýyndyryp, tazalaıdy. Attardy qyzmetke daıyndap, olardy jaryq, dybystarǵa beıimdeý maqsatynda oqý-jattyǵý jıyndaryna qatystyrady. Bir mezgilde alty at syıatyn avtokólikter jylqylardy qyzmet ornyna jedel jetkize alady. Jylqynyń densaýlyǵyn baqylaıtyn mal dárigeri de jumys jasaıdy.
Oral qalalyq ishki ister basqarmasy jergilikti polıtsııa qyzmetiniń basshysy, polıtsııa podpolkovnıgi Músilim Járdemovtiń aıtýynsha, shahar tóńiregindegi Jaıyq, Derkól jáne Shaǵan ózenderiniń aralyǵynda 16 myń saıajaı ýchaskesi men 150 saıajaı qoǵamdastyǵy ornalasqan. Osyndaı qıyn jerlerde túrli qylmys jasalady, adamdar maskúnemdikke salynyp, buzaqylyqqa barady, saıajaılar tonalady. Olarǵa avtokólikpen nemese jaıaý jetý qıyn, sondyqtan atpen júrip, baqylaý qolaıly. Sonymen qatar atty vzvod jaz kezinde Jelaev, «Karer», «Saıa» aýdandaryndaǵy jaǵajaılarda, qalalyq mádenıet jáne demalys saıabaǵynyń velojolaq bóliginde, kópshilik sharalar ótetin jerlerde adamdar tynyshtyǵyn kúzete alady.
