Oralda atty polıtseıler kólik urlaýshyny ustady
ORAL. QazAqparat - Oralda atty polıtseıler avtokólikti aıdap ketken uryny ustady, dep habarlaıdy «QazAqparat» tilshisi.
Oral qalalyq ishki ister basqarmasy jergilikti polıtsııa qyzmetiniń aǵa ınspektory, polıtsııa maıory Dınara Ábdilqalyqovanyń aıtýynsha, oqıǵa 14 qańtar kúni saǵat 12.00 shamasynda Zachagan kentinde bolǵan.
Qyzmet babymen júrgen jol-patrýldik polıtsııa batalony atty vzvodynyń qyzmetkerleri, polıtsııa aǵa serjanty Hamıt Seıtqalıev pen polıtsııa serjanty Nurbek Rahymjanovqa «Balaýsa» shaǵynaýdanynan jasyl tústi VAZ-2106 kóliginiń aıdap áketilgeni jóninde habar túsken. Saqshylar sol boıda qylmys bolǵan mańǵa bet alyp, kóp uzamaı avtokólik pen odan shyǵa qashqan er adamdy baıqaıdy.
H.Seıtqalıev pen N.Rahymjanov buryn birneshe ret spırttik ishimdik ishkeni úshin jaýapqa tartylǵan Oral qalasynyń 1978 jylǵy turǵynyn ustady.
Qazirgi kezde QR QK 200-babyna sáıkes qylmystyq is qozǵalyp, tergeý amaldary júrgizilýde.
