Oralda atmosferalyq aýa sapasyna qaıta zertteý júrgizildi
ORAL. KAZINFORM — Oral qalasynyń aýmaǵynda qatty turmystyq qaldyqtar polıgonyndaǵy órtten keıin nysanǵa jaqyn ornalasqan aýmaqtarda atmosferalyq aýa sapasyna qaıta zerthanalyq zertteýler júrgizildi.
Oral qalalyq sanıtarııalyq-epıdemıologııalyq baqylaý basqarmasynyń mamandary «Ulttyq saraptama ortalyǵy» RMK zerthana mamandarymen birlesip polıgonǵa jaqyn ornalasqan aýmaqtardan atmosferalyq aýa synamalaryn aldy.
BQO sanıtarııalyq-epıdemıologııalyq baqylaý departamentiniń baspasóz mamany Kenjegúl Muhıtovanyń málim etkenindeı, zertteý barysynda atmosferalyq aýa quramyndaǵy kúkirtsýtegi, kómirtegi oksıdi (ıis gazy), azot oksıdi, kúkirt dıoksıdi, ammıak jáne azot dıoksıdi kórsetkishteri zerthanalyq zertteýden ótkizildi.
- Zerthanalyq zertteý qorytyndysy boıynsha atmosferalyq aýa quramyndaǵy atalǵan zattar boıynsha shekti ruqsat etilgen kontsentratsııalardyń asyp ketýi anyqtalmady. Osylaısha, qaıta júrgizilgen zerthanalyq zertteýler barysynda atmosferalyq aýanyń zerttelgen kórsetkishteri boıynsha belgilengen sanıtarııalyq normatıvterden asyp ketý derekteri tirkelgen joq, - dedi K.Muhıtova.
Osyǵan deıin bastapqy zerthanalyq zertteý nátıjeleri boıynsha qalaǵa qarasty Derkól kenti aýmaǵynan alynǵan jekelegen aýa synamalarynda kúkirtsýtek pen kómirtegi totyǵy mólsheriniń shekti ruqsat etilgen deńgeıden asqany tirkelgen bolatyn.
Eske sala keteıik, budan buryn Oral turǵyndary polıgon tútininen tynys alý qıyndaǵanyn aıtyp shaǵymdanǵanyn jazǵan edik.
Sondaı-aq Oralda qatty turmystyq qaldyqtar polıgonynyń órtenýine baılanysty kásiporynǵa aıyppul salyndy.
