Oralda átkenshekte oınap júrgen 13 jasar bala eki saýsaǵynan aıyryldy
BQO polıtsııa departamenti baspasóz qyzmetinen túsken málimetke qaraǵanda, oqıǵa 27 shilde kúni shamamen saǵat 21.10-da boldy.
«2009 jylǵy bala H.Dospanova kóshesi 69-úı aýlasyndaǵy balalar alańynda ornatylǵan trenajer jabdyǵynda oınap júrip, jaraqat alǵan. Saldarynan qolynyń birneshe saýsaǵyn kesip ketken. Atalǵan derek boıynsha QR QK 306-baby 2-bóligine (qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý) sáıkes sotqa deıingi tergeý amaldary júrgizilýde», dep habarlady vedomstvodan.
BQO densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, balanyń bir saýsaǵy sol jerde kesilip qalǵan. Terisine ilinip turǵan ekinshisin aýrýhanada alyndy. Bala ambýlatorııalyq em alýǵa jiberildi.
Eske sala keteıik, budan buryn BQO-da jol apatynan 9 jasar balanyń qaza tapqanyn jazǵan bolatynbyz.
Foto: mgorod.kz