Oralda ataqty palýan Saılaý Muqashevtiń júldesi úshin dástúrli jarys márege jetti
ORAL. QazAqparat - Oralda kezinde kóptegen aıtýly dodalarda atoı salǵan dańqty palýan, 1973 jylǵy KSRO birinshiliginiń qola júldegeri, Mahachkalada ótken erkin kúresten álemniń bes dúrkin chempıony Álı Álıev atyndaǵy halyqaralyq jarystyń eki dúrkin, sondaı-aq búkilodaqtyq jazǵy aýyl oıyndarynyń bes márte jeńimpazy Saılaý Muqashevtiń júldesi úshin dástúrli jarys márege jetti, dep habarlaıdy «QazAqparat» HAA tilshisi.
BQO dene shynyqtyrý jáne sport basqarmasynan túsken málimetke qaraǵanda, 2007-2008 jylǵy týǵan jasóspirimder arasynda salmaq dárejelerine qaraı Ernur Ómirtaı (20 kg, Jańaózen), Nurdas Nurbolat (23 kg, BQO, Qaztalov aýdany), Nurshat Qonys (26 kg, Syrym aýdany), Asylhan Baıyrjan (29 kg, Bórli aýdany), Shamıl Bekmuhanov (32 kg, Bórli) jeńimpaz atandy. 2004-2006 jylǵylar arasynda Sultan Samıǵollın (26 kg, Oral), Jankeldi Óteýli (29 kg, Jańaózen), Omar Ádilhan (32 kg, Aqtóbe), Mıras Saıynov (35 kg, Jańaózen), Qazbek Baqytov (38 kg, Syrym), Sultan Bısenbaev (42 kg, Oral), Jalǵas Luqpanov (+42 kg, Jańaqala) jeńis tuǵyryna kóterildi.
Eresekter arasynda Meırambek Qartbaı (57 kg, Aqtóbe), Bek Jaqsylyq (61 kg, Aqtóbe), Amanjan Baqytjanuly (74 kg, Aqtóbe), Aslanbek Ihsanov (125 kg, Oral) altynnan alqa taqty.
Aıta keteıik, Aqjaıyq aýdanynda 1950 jyly dúnıege kelgen Saılaý Muqashev Pervomaı orta mektebinde 9-synypta oqyp júrgende Almaty dene shynyqtyrý ınstıtýtyn bitirgen sport sheberi, keıin talaı shákirt tárbıelep, Qazaqstannyń eńbek sińirgen jattyqtyrýshysy atanǵan Qamesh Ismaǵulovtan alǵashqy kúres álippesin úırenedi. Mektep bitirgennen keıin Pavlodar ındýstrııalyq ınstıtýtyna túsken Saılaý endi erkin kúresten sol oblystyń aǵa bapkeri, Qazaqstannyń eńbek sińirgen jattyqtyrýshysy Luǵat Óteshevtiń qolastynda shyńdalady. 1969 jyly ustazy ekeýi Almatyǵa aýysyp, kúres jolyna birjola túsedi. Jetpisinshi jyldary Qazaqstan quramasyn Ábilseıit Aıhanov baptasa, Saılaý Muqashev Amanjol Buǵybaevtaı dańqty palýanmen birge odaqtyq jarystarda atoı salady. Alaıda KSRO quramasynyń bapkerleri bulardy shettetip, álem chempıonattaryna qospaıdy. Esesine odaq atynan dúnıejúzilik dodalarǵa qatysyp, júldeger atanyp kelgender Amanjol ekeýinen utylyp jatatyn. Saılaýdyń tek qurama múshesi retinde KSRO - Iran, KSRO - AQSh, KSRO - Úndistan kezdesýlerine qatysqany bar. 1979 jyly Almaty dene shynyqtyrý ınstıtýtyn bitirip kelgennen keıin Oralǵa oralyp, Batys Qazaqstan aýyl sharýashylyǵy ınstıtýtynda ózi de kóptegen shákirtter tárbıeledi.
Sońǵy jyldary densaýlyǵy syr berip, aýyryp qalǵan ataqty palýan búgingi erkin kúres sheberleriniń Qazaqstan birinshiligin utsa boldy, joly ashyq ekendigin, ıaǵnı álem chempıonaty óz aldyna, tórt jylda bir keletin olımpıada oıyndarynda el namysyn qorǵaı alatyndyqtaryn jetkizip, osynyń bári - uly mártebeli táýelsizdiktiń arqasy dep biledi.
