Oralda ata-analarmen kezdesýde oqýlyq máseleleri talqylandy
ORAL. QazAqparat - QR Bilim jáne ǵylym mınıstrliginiń sarapshylary Oral qalasyndaǵy №7 orta mektepte 5-7-synyptyń ata-analarymen jáne ustazdarmen kezdesip, onda oqýlyqtardyń ýaqyt talabyna saı bolýy, salaǵa qazirgi zamanǵy oqytý tásilderin engizý qajettigi aıtyldy, dep habarlaıdy «QazAqparat» tilshisi.
QR Bilim jáne ǵylym mınıstrligi mektepke deıingi jáne orta bilim berý departamentiniń dırektory Sholpan Karınovanyń málim etkenindeı, zamanaýı oqýlyq - aqparat kózi emes, baǵyt-baǵdar berýshi. Oqýlyq ta muǵalim sııaqty: baǵyt-baǵdar beredi, oqýshynyń qabiletin damytyp, aqparat izdeýdi úıretedi. Jańa baǵdarlama - irgeli bilimge, analıtıkalyq tájirıbege negizdelgen. Jańa oqýlyqtar jańartylǵan bilim berý mazmunyna sáıkestelip, balanyń syndarly oılaı bilý qabiletin damytýǵa baǵyttalǵan. «Jańa mektep baǵdarlamasyn jasaý óte kúrdeli úderis bolǵandyqtan, biz qoǵamda túsindirý jumystaryn júrgizýimiz qajet. Sol sııaqty jańa tehnologııalar oqý protsesin uıymdastyrýdan bastap, ondaǵy muǵalimniń jáne oqýshynyń róline deıinginiń bárin ózgertýdi talap etedi. Máselen, balalardy jańartylǵan mazmundaǵy oqýlyqtarmen oqytý úshin muǵalimniń ózi daıyn bolý kerek. Bıylǵy oqý jylynda jańartylǵan bilim mazmuny boıynsha sabaq beretin 70 myńnan astam muǵalim arnaıy kýrstan ótti. Sabaq barysynda únemi áreketti aýystyryp otyrý, toppen ózara jumys isteý, bilimge basa nazar aýdarý balalardyń jeke tulǵa retinde damýyna yqpal etedi. Buryn biz oqýshyǵa daıyn bilimdi berip kelsek, endigi kúnde biz olarǵa mektepten alǵan bilimin ómirde paıdalana bilýge úıretýimiz kerek», dedi Sh.Karınova.
Jıynda sondaı-aq QR Bilim jáne ǵylym mınıstriniń keńesshisi Maırash Taıkenova, respýblıkalyq "Oqýlyq" ǵylymı-tájirıbelik ortalyǵynyń dırektory Beıbitkúl Karımova, L. Gýmılev atyndaǵy Eýrazııa ulttyq ýnıversıtetiniń professory Evgenııa Jýravleva, "Mektep" baspasynyń dırektory Erlan Satybaldıev jáne basqalar 5-7 synypqa arnalǵan orys tili oqýlyqtary jáne jańartylǵan bilim mazmuny jóninde oı-pikirlerin bildirip, saýaldarǵa jaýap berdi.
Jıynǵa qatysqan ata-analar balalarynyń syndarly oılaý qabiletin damytatyn tapsyrmalarǵa qarsy emestigin, sonymen qatar keıbireýleriniń kókeıge qonbaıtyndyǵyn, jańa oqýlyqta neologızm sózderiniń jıi kezdesetinin tilge tıek etti.
Sarapshylardyń baıan etkenindeı, grammatıka, orfografııa jáne tynys belgileri orys tilin oqytý baǵdarlamasynyń negizi bolyp qalyp otyr. Tek oqytý tásilderi ózgergen.
Sondaı-aq mamandar QR Bilim jáne ǵylym mınıstrliginiń «Oqýlyq» respýblıkalyq ǵylymı-praktıkalyq ortalyǵy «Qoǵamdyq baǵalaý» portalyna qazirgi ýaqytta memlekettik saraptamadan ótip jatqan 3, 6, 8-synyp oqýlyqtarynyń ornalastyrylǵanyn atap ótti. Oqýlyqtardy «Oqýlyq» respýblıkalyq ǵylymı-praktıkalyq ortalyǵynyń saıtynda ornalasqan (www.okulyk-edu.kz) «Oqýlyqtardy qoǵamdyq baǵalaý» banneri arqyly kórýge bolady. Bul portal oqý ádebıetteriniń sapasy boıynsha ata-analardyń jáne pedagogtar qaýymynyń pikirleri men usynystaryn qabyldaýǵa arnalǵan.
