Oralda áskerı bólimge shabýyl jasamaq bolǵan terrorıstik topqa úkim shyqty
BQO qylmystyq ister jónindegi mamandandyrylǵan aýdanaralyq sotynan túsken málimetke qaraǵanda, J.Eskendirov, A.Ismýrzın, T.Karchegenov, E.Baltabaev, N.Aıtbolatov, S.Tilekbaev, R.Jastalapov jáne kámeletke tolmaǵan Q.Birǵalıev aıypty dep tanyldy.
Sot talqysynda belgili bolǵandaı, 2018 jyldyń qańtar-sáýir aılarynda J.Eskendirov Oral qalasynda «salafı jıhad» baǵytyn ustanatyn, dinı radıkaldyq kózqarastaǵy A.Ismýrzın, T.Karchegenovpen tanysyp, Sırııaǵa barmaı-aq, Oral qalasynda quqyq qorǵaý organdary men áskerılerge qarsy qarýly jıhad, ıaǵnı terrorızm aktilerin jasaý úshin uıymdasqan terrorıstik topqa (jamaǵat) birigý jaıly aqyldasyp, top qurǵan.
Osy maqsatta olar mamyr aıynda topty kúsheıtý maqsatymen E.Baltabaev, N.Aıtbolatov, S.Tilekbaevtyń qatysýymen basqosý jıyndaryn uıymdastyryp, jıhad jasaımyz dep, ýaǵyzdar júrgizip, dinı alaýyzdyqty qozdyryp, terrorızmdi nasıhattaǵan.
Keıin jalǵa alǵan páterge jınalyp, dinı áńgime qozǵap, Abaı polıtsııa bólimine basyp kirip, jaryp jiberý jóninde aıtqan.
Osylaısha J.Eskendirov, T.Karchegenov, A.Ismýrzın ıslam dinine jańadan bet bura bastaǵan, dinı bilimderi joq E.Baltabaev, N.Aıtbolatov, S.Tilekbaev, R.Jastalapov jáne kámeletke tolmaǵan Q.Birǵalıevti terrorıstik top quramyna kirgizgen. Maýsym aıyndaǵy jıynda J.Eskendirovti ámir retinde saılaǵan.
Onymen qoımaı, J.Eskendirov belgisiz tulǵadan sholaq ańshy myltyqtaryn oq-dárisimen satyp alyp, páter ishinde onymen qalaı atý kerektigin top músheleri bir-birine kórsetip, úıretken. Aqyry maýsym aıynyń sońynda olar Oral qalasynda ornalasqan polıtsııa bólimine, 5517-áskerı bólimine jáne UQK departamentiniń ǵımaratyna kútpegen jerden shabýyl jasaý jóninde sheshimge keldi.
25 maýsym kúni QR UQK BQO boıynsha departamenti qyzmetkerleri terrorıstik toptyń qylmystyq is-áreketin áshkerelep, ustalyp, olardyń kózdegen maqsaty iske aspady.
Sonymen, sot úkimimen 25 jasar J.Eskendirov pen 35 jasar A.Ismýrzın QR QK 174-baby 3-bóligi (qylmystyq toppen jasalǵan dinı alaýyzdyqty qozdyrý), 256-baby 2-bóligi (terrorızmdi nasıhattaý), 259-baby 2-bóligi (terrorıstik áreketti uıymdastyrý maqsatynda kámeletke tolmaǵan adamdy azǵyryp kóndirý), 287-baby 5-bóligi (qylmystyq top quramynda qarýdy zańsyz ıemdený, tasymaldaý, saqtaý), 257-baby 1-bóligi (terrorıstik topty qurý, oǵan basshylyq etý), 24-baby 1-bóligi jáne 255-baby 4-bóligine (terrorıstik aktiler jasaýǵa daıyndalý) sáıkes aıypty dep tanylyp, árqaısysyna túpkilikti 13 jyl bas bostandyǵynan aıyrý jazasy kesildi. Sol sekildi 52 jasar T.Karchegenov QK 174-baby 3-bóligi, 256-baby 2-bóligi, 259-baby 2-bóligi, 257-baby 1-bóligi, 24-baby 1-bóligi, 255-baby 4-bóligimen aıypty dep tanylyp, ol túpkilikti 12 jyl 6 aı merzimge bas bostandyǵynan aıyryldy.
19 jasar E.Baltabaev pen 20 jasar N.Aıtbolatov QK-niń 174-baby 2-bóligi (adamdar tobymen aldyn ala sóz baılasyp, qasaqana dinı alaýyzdyq qozdyrý), 256-baby 2-bóligi, QK-niń 257-baby 2-bóligi, 24-baby 1-bóligi, 255-baby 4-bóligimen aıypty dep tanylyp, bul ekeýine QK-niń 55-baby 4-bóligin qoldaný (belgili bir quqyq buzýshylyq úshin kózdelgen jazadan góri neǵurlym jeńil jaza taǵaıyndaý) arqyly túpkilikti 5 jyl bas bostandyǵynan aıyrý jazasy taǵaıyndaldy. 21 jasar S.Tilekbaev QK-niń 257-baby 2-bóligi, 24-baby 1-bóligi 255-baby 4-bóligimen aıypty dep tanylyp, QK-niń 55-baby 4-bóligin qoldanylyp (belgili bir quqyq buzýshylyq úshin kózdelgen jazadan góri neǵurlym jeńil jaza taǵaıyndaý), oǵan túpkilikti 3 jyl bas bostandyǵynan aıyrý jazasy taǵaıyndaldy. 18 jasar R.Jastalapovqa QK-niń 257-baby 2-bóligi, 24-baby 1-bóligi, 255-baby 4-bóligi men 55-baptyń 4-bóligi qoldanylyp, túpkilikti 5 jyl bas bostandyǵynan shekteý jazasy kesildi.
Kámeletke tolmaǵan 16 jasar Q.Birǵalıevke QK-niń 257-baby 2-bóligi, 287-baby 5-bóligi, 24-baby 1-bóligi, 255-baby 4-bóligi men 55-baptyń 4-bóligi qoldanylyp, túpkilikti 2 jylǵa bas bostandyǵy shekteldi.
