Oralda áskerge barýdan qashqan tórt jigittiń biri aýyr halde jatyr
ORAL. KAZINFORM – Oralda áskerge shaqyrylǵan tórt jigit oblystyq jınaqtaý pýnktinen qashqan.
BQO qorǵanys isteri jónindegi departament bastyǵynyń orynbasary Albert Bekmuhanovtyń málim etkenindeı, oqıǵa 1 jeltoqsanǵa qaraǵan túni bolǵan. Onyń sózine qaraǵanda, 30 qarasha kúni tórt áskerge shaqyrylýshyny polıtsııa qyzmetkerleri alyp kelgen.
– Túngi saǵat 02.00-de úshinshi qabatta terezege bıyl qondyrylǵan temir tordy syndyrǵan. Toǵyz odeıalony, sonyń ishinde úsheýin jyrtyp bir-birine baılap, úshinshi qabattyń terezesinen sekirgen. Sol kezde olardyń bireýi aýyr jaraqat alǵan. Jedel járdem shaqyrylyp, emdeý mekemesine jetkizildi. Departament jáne medıtsınalyq qyzmet bastyǵy baryp, halin bildi, qazir jaǵdaıy óte nashar, - deıdi A.Bekmuhanov.
Onyń aıtýynsha, QR QK 387-babyna (áskerı qyzmetten jaltarý) sáıkes qylmystyq is qozǵalyp, Abaı polıtsııa bólimine qoldaýhat jiberilgen.
Atalǵan bap boıynsha aıypty dep tanylǵan adam bir myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne tórt júz saǵatqa deıingi merzimge qoǵamdyq jumystarǵa tartýǵa ne bir jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.
Eger áskerge shaqyrylýshy tergep-tekserý organy isti sotqa bergenge deıin áskerge shaqyrý pýnktine óz erkimen kelse, ol qylmystyq jaýaptylyqtan bosatylady. Osyny aǵaıyn-týmalary túsindirgen bolar, qashqan jastardyń úsheýi kelesi kúni shaqyrý ýchaskesine qaıtyp kelgen.
– Aýrýhanada jatqan jigit 2023 jyly dıplomyn alǵan. Áskerı qyzmetin óteýdi keıinge qaldyrýǵa jáne bosatýǵa da negiz joq. Oǵan qatysty izdestirý jumystary júrgizilgen. Shaqyrý qaǵazy qyrkúıek jáne qarasha aıynda qolyna berilgen. Sonymen qatar kóktemde eki ret jáne qazanda 1414 nómiri arqyly SMS habarlamany ózi alǵan. «Áskerı qyzmet jáne áskerı qyzmetshilerdiń mártebesi týraly» Zańnyń 30-babynda «Shaqyrý qaǵazyn azamattyń jeke ózine tapsyrý múmkin bolmaǵan jaǵdaıda, onyń kelýin qamtamasyz etý tıisti ishki ister organyna júkteledi» dep kórsetilgen. Qazirgi tańda QR QK 387-babyna sáıkes tergeý amaldarymen qatar osy oqıǵa boıynsha qyzmettik tekseris júrgizilýde. Kezekshi bolǵan qyzmetkerge qatysty tekseris qorytyndysy boıynsha tıisti shara qoldanylatyn bolady, - deıdi A.Bekmuhanov.
Aýrýhanada aýyr halde jatqan 19 jastaǵy Meırambek Seıfollaevtyń aǵasy Nurhat Ábilǵazıevtiń aıtýynsha, inisiniń dostaryna erip qashqandyǵyn jetkizdi.
- Іnimdi úıden májbúrli túrde alyp ketken, ol moraldyq-psıhologııalyq jaǵynan daıyn emes edi. Endi onyń osyndaı kúıge ushyraǵany janymyzǵa batady. Qazir oblystyq aýrýhanada jatqan inimniń jaǵdaıy óte qıyn. Múgedek bolyp qalý qaýpi bar. Úshinshi qabattan qulaǵan kezde omyrtqasy synǵan, julynyna zaqym kelgen. Kishi jáne úlken dáretke otyrýy qıyndap ketken. Oqıǵa bolǵan ýaqytta kezekshi ornynda otyrmaǵan. Sodan keıin terezedegi temir tor osal bolǵan. Áskerge jastardy kúshtep áketip jatqan soń durystap bekitý qajet edi. Sosyn jedel járdemdi belin qaıyryp aldy dep shaqyrǵan. Úshinshi qabattan sekirdi degende, jedel járdem tez keletin edi. Olar kelgenshe, 1-1,5 saǵattaı ýaqyt ótken. Qysqasy, áskerı kazarma qyzmetkerleriniń óz jumysyna salǵyrt qaraǵanyna narazymyn. Taǵy bir aıta ketetin jaıt, qashqandardyń biri Beksultan anasyna habarlasyp, áskerden alyp qalýyn ótingen. Áıtpese «Qashamyz» degen. Beksultannyń anasy Oralbaı esimdi áskerı qyzmetshige habarlasyp, balalardyń qashqysy kelip otyrǵanyn eskertken, - deıdi N.Ábilǵazıev.
Meırambekpen birge qashqan Álı Beıbittiń málimdeýinshe, ol áskerge shaqyrý pýnktine óz erkimen barǵan.
– 30 qarasha, senbi kúni tús mezgilinde Beksultan Qubaev degen dos balamdy úıinde uıyqtap jatqan jerinen polıtsııa qyzmetkerleri alyp ketken. Saǵat besterde bizdiń úıge de keldi. Ákem dúısenbi kúni aparamyn dedi. Biraq Beksultan men Meırambek sonda dep estigennen keıin olardan qalǵym kelmeı, men de bardym. Keshke buryn tanymaıtyn bir jigit kelip, ákemde bári, áskerı komıssarıatta tanysy, aqsha da bar, barlyǵyn sheship beremin dep, bizdi úgitteı bastady. Sóıtip túngi ekide aldymen sol tústi. Sosyn Beksultannan keıin kezek maǵan keldi. Biraq birinshi qabatqa jaqyndaǵanda odeıalo úzilip ketti. Munyń úzilip ketkenin jáne bizdiń eskertip aıtqanymyzdy estimegen Meırambek jerge qulady. Ol jedel járdem shaqyrýymyzdy surap, bizge kete berińder dedi. Qaqpadan sekirgen kezde qolymdy syndyryp aldym, - deıdi Á.Beıbit.
BQO polıtsııa departamentiniń baspasóz qyzmeti atalǵan oqıǵa boıynsha Abaı polıtsııa bólimimen sotqa deıingi tergeý bastalǵanyn habarlady.
– Qazirgi kezde tergeý amaldary júrgizilýde. Basqa aqparat QR Qylmystyq is júrgizý kodeksiniń 201-babyna sáıkes jarııalanýǵa jatpaıdy, - dep naqtylady BQO polıtsııa departamentiniń baspasóz qyzmeti.
Eske sala keteıik, budan buryn Oralda 17 jastaǵy qostanaılyq jasóspirimniń esirtkimen ustalǵanyn jazǵan bolatynbyz.