Oralda «Ashyq úkimet» jobasyn engizý máseleleri talqylandy
ORAL. QazAqparat - BQO ákimdiginde «Ashyq úkimet» jobasyn engizý jáne memqyzmet sapasyn arttyrý máseleleri talqylandy, dep habarlaıdy «QazAqparat» tilshisi.
Óńirge «Ashyq úkimet: halyqaralyq praktıka jáne Batys Qazaqstan oblysynyń tájirıbesi» taqyrybynda semınar ótkizýge kelgen Nazarbaev Ýnıversıtet professorlary Kolın Noks pen Karl O'Konnor, sondaı-aq assıstent-professor Saltanat Jánenova oblys ákimi Altaı Kólginovpen, oblystyq basqarmalar basshylarymen, azamattyq qoǵam ókilderimen, M.Ótemisov atyndaǵy Batys Qazaqstan memlekettik ýnıversıtetiniń ǵalymdarymen kezdesti.
Professorlardyń atap ótkenindeı, semınar maqsaty - memlekettik qyzmetshiler men azamattyq qoǵam ókilderiniń «Ashyq úkimet» salasyndaǵy álemdik baǵyt-baǵdar týraly tanym-túsinigin keńeıtý, óńirdegi oń tájirıbeni talqylaý.
«Biz sııaqty sheteldik azamattarǵa Astanadan óńirlerge shyǵyp, qazaqstandyqtardyń qalaı ómir súrip jatqanyn bilý óte qyzyqty. Osyndaı semınarlardy Ońtústik Qazaqstan, Shyǵys Qazaqstan oblystarynda, sondaı-aq Almaty, Astana qalalarynda ótkizbekshimiz. Sapar barysynda «100 naqty qadam» ult josparynyń jergilikti jerde qalaı júzege asyrylyp jatqanyn bilgimiz keledi. Bizdiń professorlar halyqaralyq tájirıbeni eskere otyryp, «Ashyq úkimet» jobasynyń júzege asyrylýyna taldaý jasady. Sondyqtan birqatar zertteýler nátıjesin ortaǵa salýmen birge jergilikti jerdegi tájirıbeni eskere otyryp, oı-pikirlerdi bilý mańyzdy. Halyqaralyq turǵydan qaraǵanda, «Ashyq úkimet» joǵarydan tómen qaraı emes, kerisinshe qoǵamnyń áser-yqpalymen tómennen joǵary qaraı qurylýy kerek. «Ashyq úkimet» jobasy Qazaqstanda azamattardyń úkimetke, sonymen qatar úkimettiń turǵyndarǵa degen senimin arttyrýǵa múmkindik beredi», dedi Karl O'Konnor.
Oblys basshysy Altaı Kólginov óńirde memlekettik qyzmet sapasyn arttyrý baǵytynda maqsatty jumys júrgizilip jatqanyn jetkizdi. Mysaly, budan on jyl buryn turǵyn úı men balabaqsha kezeginde biraz másele týyndap kelse, qazir bári ashyq túrde sheshilgen. Ár azamat óziniń úıinde otyryp kezektiń qalaı jyljyp jatqanyn baqylaı alady. Sońǵy jyldary turǵyn úı qurylysynyń qarqyndy júrgizilip jatqanyna qaramastan, 22 myńdaı turǵyn áli kezekte tur. Oralda sondaı-aq «Aqyldy qala» jobasy da júzege asyrylyp jatqany belgili. Árıne, ashyqtyq pen jarııalylyq jaǵynan áli de kóp nárseni tyndyrýǵa týra keledi.
Professorlardyń pikirinshe, «Ashyq úkimet» jobasy memlekettik qyzmetten bólek, sybaılas jemqorlyqpen kúres, memlekettik satyp alýlar, memlekettik saladaǵy ınnovatsııalar syndy barlyq salany qamtýy tıis.
Basqosý barysynda oblystyq basqarmalar basshylary óz mekemelerinde «Ashyq úkimet» jobasy boıynsha ne jasalyp jatqany jóninde áńgimelep berdi. Eń bastysy, memlekettik qyzmet turǵyndar úshin ashyq, qoljetimdi jáne sapaly bolýy kerek. Mysaly, qazirgi kezde batysqazaqstandyqtarǵa halyqqa qyzmet kórsetý ortalyqtary arqyly 332 qyzmet túri kórsetiledi.
