Oralda ashylýy tıis keleshek mektebi nege merziminde berilmeı qaldy
ORAL. KAZINFORM — Oral qalasyna qarasty Zachagan kentinde «Keleshek mektepteri» ulttyq jobasy aıasynda salynyp jatqan 600 oryndyq mektep 30 tamyzda tapsyrylýy tıis edi.
Alaıda Medkolledj aýdanyndaǵy mektep qurylysy áli júrgizilip jatyr. Osyǵan oraı máseleniń mán-jaıyn bilý maqsatynda tapsyrys berýshi «Samruk-Kazyna Construction» AQ-ǵa resmı saýal joldandy.
Kompanııanyń málimetine qaraǵanda, Úkimettiń 2022 jylǵy 30 qarashadaǵy № 963 qaýlysyna sáıkes «Jaıly mektep» ulttyq jobasyn iske asyrý merzimi 2025 jyldyń sońyna deıin dep belgilengen.
Oral qalasyndaǵy Jáńgir han kóshesinde salynyp jatqan 600 oryndyq mektep qurylysynyń
Bilim kúnine deıin aıaqtalmaýynyń negizgi sebebi — merdiger uıym «JJ Construction» JShS-nyń (burynǵy «Jaıyq jaryǵy» JShS) óz mindettemelerin tıisinshe oryndamaýy.
Merdiger tarapynan qurylys alańyna qajetti eńbek resýrstary, arnaıy tehnıka men qurylys materıaldary ýaqytyly jetkizilmedi.
Shart talaptaryna sáıkes, merdigerge aıyppul sanktsııalary salyndy.
— Qazirgi ýaqytta qurylys jumystary jandanyp, nysandy 2025 jylǵy 30 qyrkúıekke deıin aıaqtaý josparlanýda. Tapsyrys berýshi tarapynan qurylys barysy qatań baqylaýǵa alynyp, jumystardyń sapaly jáne ýaqytyly oryndalýy qamtamasyz etilýde, — delingen resmı jaýapta.
Qurylys basynda merdiger mekeme ókiliniń pikirin bilmek bolyp edik. Áıtse de kompanııa bas dırektorynyń orynbasary, joba jetekshisi Maqsat Batyrbekov aqparat bere almaıtynyn alǵa tartty.
BQO qurylys basqarmasynyń basshysy Nurken Moldashevtiń naqtylaýynsha, «Keleshek mektepteri» ulttyq jobasy aıasynda úsh ǵımarat qurylysyn bıylǵy 1 qyrkúıekke deıin bitirý kózdelgen edi.
Osynyń ishinde Báıterek aýdany Baıqonys aýylyndaǵy Qadyr Myrza Áli atyndaǵy 600 oryndyq mektep qana paıdalanýǵa berildi.
Oraldaǵy atalmysh mektepten basqa Báıterek aýdany Dostyq aýylyndaǵy 1 200 oryndyq bilim nysany qurylysy da máresine jete qoıǵan joq.
— Osy eki mektepti salý barysynda otandyq qurylys materıaldarymen qamtý boıynsha qıyndyqtar týyndady. Munyń bir sebebi — Qazaqstan boıynsha «Keleshek mektepteri» baǵdarlamasy aıasynda jyl basynan beri 104 mekteptiń qurylysy júrip jatyr. Bul qurylys materıaldaryna suranysty kóbeıtip jiberdi. Bári bir jerden alynatyndyqtan, irkilisterdiń bolýyna áser etti. Dostyq aýylyndaǵy 1 200 oryndyq mektep ǵımaratynda qurylys-montaj jumystary tolyqtaı aıaqtaldy. Qazirgi kezde iske qosý-retteý, aýmaqty abattandyrý jáne tehnologııalyq jabdyqtarmen jaraqtandyrý jumysy atqarylyp jatyr, — deıdi basqarma basshysy.
Onyń sózine qaraǵanda, atalmysh nysanǵa lınearlyq panel, ventılıatsııalyq órtke qarsy klapan, taqtatas sekildi qurylys materıaldaryn Aqtóbe, Almaty, Shymkent qalalarynan jetkizý 2-3 aıǵa keshiktirilgen.
Kúni búgin barlyq qajetti materıaldar qurylys basynda. Sol sekildi osyndaı kidirýshilik Oral qalasyndaǵy Jáńgir han kóshesinde boı kóterip jatqan mektep qurylysynda da boldy.
— Munda fıbrotsementti taqtatas (Semeıden) — 2 aıǵa, 80 mm trotýar órnektasy — 1,5, qıyrshyq tas (Aqtóbeden) — 1 jáne lınoleým men jaryqshamdar 3 aıǵa keshiktirildi. Fıbrotsementti taqtatas tolyqtaı ákelindi. Qalǵan materıaldar osy aıdyń aıaǵyna deıin jetkiziledi, — dep qosty N.Moldashev.
Oralda «Zachagan» baý-baqsha seriktestiginde turatyn oqýshylar úshin salynyp jatqan atalmysh mekteptiń der kezinde iske qosylmaýy saldarynan osy mańdaǵy bilim ordasynda úsh aýysymdylyq joıylmaı otyr.
Zachagan kentindegi Á. Moldaǵulova atyndaǵy № 38 mektep-lıtseıiniń dırektory Aqushtap Súıinǵalıevanyń málim etkenindeı, qazir munda 2 500 bala úsh aýysymda oqyp jatyr.
— Medkolledj aýdanyndaǵy jańa mektepke 47 synyp, barlyǵy 1 377 bala aýysýy tıis, — deıdi mektep dırektory.
«Qus fabrıkasy» dep atalyp ketken «Zachagan» baý-baqsha seriktestiginde 12 myńdaı halyq turady.
— Tórt balaly otbasymyz. Úlkeni № 38 mektep-lıtseıinde 4-synypta oqıdy. Odan keıingisi 1-synypqa bardy. Jańa mektep ashylǵan jaǵdaıda tasymaldaý uıymdastyrylsa eken deımiz. Óıtkeni ózim jumystamyn, kishkentaıymyz qyrqynan jýyrda shyqty, kelinshegim bala kútimimen demalysta otyr. Ekinshiden, jol salynsa eken. Úshinshiden, baý-baqsha seriktestiginde 2 300-den astam úı bar. Qalanyń irgesinde turyp, turmystyq qıyndyqtardan aryla almaı kelemiz. Sondyqtan seriktestik qalaǵa qosylyp, eldi meken mártebesi berilse eken, — dedi «Zachagan» baý-baqsha seriktestiginiń turǵyny Jandos Kenjın.
Eske sala keteıik, budan buryn Oralda salynyp jatqan jaıly mektep qurylysy nelikten kesheýildegenin jazǵan edik.
Sondaı-aq Batys Qazaqstanda keleshek mektebi esigin aıqara ashty.