Oralda Arystan kelgen balalar demalyp jatyr
Ortalyq dırektory Gúlsim Dúısenǵalıevanyń aıtýynsha, «Úsh tuǵyrly til» jazǵy mádenı-tanymdyq aýysymyna Arystan barlyǵy 50 bala (2-11 synyp oqýshylary) keldi.
Sonymen qatar Samara oblysynan «Aq jol» aımaqtyq qazaq ulttyq-mádenı avtonomııasy uıymynyń 2-8 synyp, óńirdegi mektepterden 4-8 synyp oqýshylary (barlyǵy 100-den astam) tynyǵýda.
«Bul aýysym memlekettik til mártebesin tereń uǵyndyrý, balalardyń sózdik qorlary men til baılyǵyn damytý, ózge de tilderdi qurmet tutýǵa, dostyqqa tárbıeleý maqsatynda uıymdastyryldy. Oqýshylar keshe kelse, búgin aýysym saltanatpen ashyldy. 19 shildege deıin balalar úshin túrli qyzyqty sharalar josparlanǵan», dedi G.Dúısenǵalıeva.
On kúnge sozylatyn aýysym kezinde úshtildilikti meńgerýge baılanysty tanymdyq sabaqtar, trenıngter, jiptik kýrstar, mádenı-tanymdyq sharalar, sporttyq oıyndar ótkizilmekshi.
Balalar oblys ortalyǵyndaǵy mýzeılerge, qala irgesindegi Jaıyq qalashyǵyna, Dostyq úıine, H.Esenjanov atyndaǵy oblystyq balalar jáne jasóspirimder kitaphanasyna, basqa da rýhanııat ortalyqtaryna barady. Kontsertter men teatr qoıylymyn tamashalaıdy.
Ár kúnniń óz taqyryby bar. Mysaly, 11 shilde kúni «Biz bir komandamyz» degen atpen ótip, balalardyń bir-birimen jaqynyraq tanysýyna mán beriledi. 12 shilde kúni «Juldyzdy kún» aıasynda oqýshylar qalanyń birqatar kórnekti oryndaryna saıahat jasaıdy. 13 shilde kúni «Ana tiliń - aryń bul» taqyrybymen qazaq tilinde sóılesse, 16 shildede orys, 18-inde aǵylshyn tiline kezek tıedi.
«Aýysymǵa kelgen barlyq balalar, ásirese, Arystan jetken jasóspirimder jazǵy demalysyn kórkem tabıǵat aıasynda mándi de sándi ótkizip, tyń kúsh jınasa, bizdiń de maqsatymyzdyń oryndalǵany», dedi ortalyq dırektory.
Eske sala keteıik, budan buryn Arystan 50 balanyń Oral qalasynda demalatynyn jazǵanbolatynbyz.