Oralda «Arman qala - Astana!» án baıqaýynyń jeńimpazdary anyqtaldy
ORAL. QazAqparat - Oralda elordanyń 20 jyldyǵyna oraı «Arman qala - Astana!» atty áýesqoı kompozıtorlardyń oblystyq án baıqaýy márege jetti, dep habarlaıdy QazAqparat tilshisi.
Astana qalasynyń abyroı-bedelin án qanatynda asqaqtatyp, ásem ajary men tabıǵatyn nasıhattaý maqsatynda oblystyq halyq shyǵarmashylyǵy ortalyǵy uıymdastyrǵan aıtýly óner dodasyna 16 áýesqoı kompozıtor qatysyp, baq synady.
Arnaıy qurylǵan qazylar alqasyna kompozıtorlardyń Astana jáne týǵan jer men el týraly eki áni avtory kórsetilmeı, berildi. Týyndylar tyńdalyp, jabyq irikteýden ótkizildi. Sonyń nátıjesinde 11-i úzdik dep tanyldy.
Baıqaý qorytyndysynda kezinde elge «Ákem - ánim» ánimen keńinen tanylǵan QR mádenıet qaıratkeri, kóptegen týyndynyń avtory, oraldyq Ádilbek Súleımenov bas júldeni jeńip aldy.
Qaratóbe aýdanynan kelgen Marat Tajaıaqov birinshi, oraldyqtar Qýanysh Qısmetov pen Qadyrbolat Edirov ekinshi, zelenovtyq Gúlbarshyn Qasıetova, syrymdyq Armat Aldamjarov, oraldyq Sholpan Jasmaǵambetova úshinshi orynǵa ıe boldy.
Sonymen qatar aqjaıyqtyq Rahım Janaısov, qaztalovtyq Baıan Qabıeva, syrymdyq Almas Elshibekov, jánibektik Jaqsylyq Bısenǵalıev dıplomant atandy.
Oblystyq halyq shyǵarmashylyǵy ortalyǵynyń dırektory Máýlet Jubatovtyń aıtýynsha, atalmysh án saıysy budan eki jyl buryn alǵash ret ótkizilgen bolatyn. Bıyl ekinshi ret uıymdastyrylyp otyr.
«Baıqaýda Ádilbek Súleımenov, Gúlbarshyn Qasıetova, Baıan Qabıeva syndy burynnan áýesqoı kompozıtor retinde aty shyǵyp júrgendermen qatar jastar da kórindi. El ishinde júrgen daryn ıelerin qoldaý, kótermeleý baǵytynda bul doda aldaǵy ýaqytta da jalǵasyn tabatyn bolady», dedi QazAqparat tilshisine M.Jubatov.
