Oralda ardagerler arasynda respýblıkalyq spartakıada aıaqtaldy
Tórt jylda bir ret uıymdastyrylatyn aıtýly dodaǵa Shymkent qalasynan, sondaı-aq Aqmola, Atyraý, Jetisý, Qostanaı, Qyzylorda, Pavlodar, Soltústik Qazaqstan, Túrkistan jáne Batys Qazaqstan oblystarynan 10 komanda quramynda 400-den astam sportshy qatysty.
Ardager sportshylar voleıbol, ústel tennısi, shaǵyn fýtbol, qazaq kúresi, toǵyzqumalaq jáne shahmattan synǵa tústi.
Jarys qorytyndysynda jalpykomandalyq esepte Túrkistan oblysy úzdik shyqsa, atyraýlyqtar ekinshi, batysqazaqstandyqtar úshinshi orynǵa ıe boldy.
QR Mádenıet jáne sport mınıstrligi Sport jáne dene shynyqtyrý isteri komıteti sportty damytý dırektsııasynyń basqarma basshysy Ǵazız Serikbaevtyń aıtýynsha, spartakıada maqsaty – buqaralyq sportty damytý, sonyń ishinde ardagerlerdiń belsendiligin arttyrý, sporttyq tabys-jetistikterge yntalandyrý.
«Salaýatty ómir saltyn ornyqtyrýda sporttyń mańyzy zor. Osy oraıda ózderin babynda ustap, aldyńǵy shepten kórinip júrgen ardagerler az emes. Olar sheberlik deńgeıleriniń joǵary ekendigen Oraldaǵy spartakıadada da kórsetti», dedi Ǵ.Serikbaev.
Shaǵyn fýtboldan BQO quramasy chempıon atansa, atyraýlyqtar ekinshi, qostanaılyqtar úshinshi orynnan kórindi.
«Shaǵyn fýtbol dodasyna barlyǵy 9 komanda qatysyp, eki topqa bólindi. Bizdiń topta Shymkent, Qyzylorda, Atyraý sııaqty kúshti quramalar boldy. Qyzylordalyqtarmen teń túsip, qalǵandaryn qapy qaldyryp, ekinshi orynmen sheshýshi básekelerge joldama aldyq. Onda áýeli SQO quramasyn tize búktirdik. Sodan keıin fınalda atyraýlyqtarmen qaıta kezdestik. Oıyn teń aıaqtalyp, penaltı serııasynda biz jeńiske jettik. Osylaısha, 50 jastan joǵary ardagerler arasynda BQO quramasy respýblıkalyq spartakıadada alǵash ret chempıondyq ataqqa ıe boldy. Aramyzda 53, 55 jastaǵylar bar, ózimniń jasym 58-de. Sportpen udaıy aınalysyp, jastarǵa úlgi kórsetip kelemiz», dedi QazAqparat tilshisine shaǵyn fýtboldan BQO quramasynyń kapıtany Rashıd Hýsnýtdınov.
