Oralda apatty jaǵdaıdaǵy mektep ornyna jańa ǵımarat boı kóterýde
ORAL. QazAqparat - Búgin Batys Qazaqstan oblysynyń ákimi Altaı Kólginov Oral qalasynda jańadan salynyp jatqan №4 orta mektep jáne toǵyz qabatty turǵyn úı qurylysymen tanysty, dep habarlaıdy «QazAqparat» HAA tilshisi.
Shahardaǵy 2-jumysshy aýdanynda oryn tepken №4 orta mektep ǵımaratynyń irge kótergenine jarty ǵasyrdaı ýaqyt ótken. Apatty jaǵdaıda bolyp, jóndeýge kelmegendikten, úsh qabatty ǵımarat tolyqtaı buzylyp, ornyna qazirgi zaman talaptaryna tolyq saı keletin tórt qabatty 300 oryndyq jańa mektep boı kótermekshi. Onyń ishinde synyp bólmeleri, túrli kabınetterge qosa ashana, sport zaly, eki topqa arnalǵan shaǵyn ortalyq jáne basqa qajetti oryndar bolmaqshy. Jańa ǵımarat qurylysyna respýblıkalyq bıýdjetten 950 mln. teńge bólingen. Qazirgi tańda merdiger kompanııa «Altaır» JShS eski ǵımaratty buzyp, irgetasyn quıý jumystaryn júrgizýde.
Altaı Kólginovtiń aıtýynsha, oblysta jeti birdeı mektep salynatyn bolsa, sonyń tórteýi oblys ortalyǵynda, úsheýi Zelenov, Bórli, Qaztalov aýdandarynda iske qosylmaqshy. Osynyń bárine el qazynasynan 8 mlrd. jýyq teńge qaraldy.
Oral qalasynda sońǵy kezde memlekettik-jeke menshik áriptestik arqyly jergilikti qurylys kompanııalarymen kelise otyryp, apatty úılerdiń ornyna kóp qabatty turǵyn úıler salý qolǵa alyndy. Sonyń biri Gagarın kóshesi boıynda ótken ǵasyrdyń elýinshi jyldary paıdalanýǵa berilgen apatty jaǵdaıdaǵy eki qabatty úıdiń (12 páter) ornyna toǵyz qabatty ǵımarat (126 páter) salynbaqshy. Qazirgi tańda turǵyndary kóshirilgen úı buzylýda. 2016 jyldy qosa eseptegende, shaharda osyndaı on úıdiń ornyna jańalary boı kóterýde. Bul qurylys kompanııalary úshin de tıimdi. ıAǵnı olar apatty úı turǵyndaryna páterlerin bergennen keıin qalǵanyn turǵyndarǵa satady. Injenerlik jelilerdi tartý men abattandyrý jumystary memleket esebinen júrgiziledi. Oralda apatty jaǵdaıdaǵy 41 úı bolsa, aldaǵy úsh jyl ishinde solardyń bári kezeń-kezeńmen jańartylmaq.
Oblys ákimi merdiger kompanııalar basshylaryna qurylysty sapaly salýdy jáne oǵan múmkindiginshe elimizde shyǵarylatyn materıaldardy paıdalanýdy tapsyrdy.
«Jańa mekteptiń salynyp jatqanyna oqýshylar da, ata-analar da qýanyshty. Aldaǵy oqý jylynda syńǵyrlaǵan ǵımaratqa kirip jatsaq, jetkinshek urpaqqa budan artyq qandaı syı bolmaqshy. Kúni búgin mektep shákirtteri №26 orta mektepke syıysyp, eki aýysymda bilim alýda. №4 mektepte 287 oqýshy, 39 muǵalim bar», dedi «QazAqparat» tilshisine №4 orta mektep dırektory Máýlen Dilmaǵambetov.
