Oralda apatty úıi súrilgen turǵyndar nelikten baspana ala almaı otyr
ORAL. KAZINFORM — Oral qalasynda apatty úıi súrilgen turǵyndardyń baspana ala almaı otyrǵany jóninde áleýmettik jelide beınejazba jarııalandy.
Turǵyndardyń sózine qaraǵanda, M.Júnisov kóshesi 34-mekenjaıdaǵy eki qabatty úı budan úsh jyl buryn súrilgen. Kópbalaly eki otbasy sodan beri baspanaǵa qol jetkize almaı keledi.
— 2023 jyly Oral qalasy ákimdigi, qurylys salýshy kompanııa jáne úı ıeleriniń arasynda úsh jaqty kelisim shart jasaldy. Sol jerden eki jyldan keıin úı beremiz degen. Bıyl sáýirde úsh jyl bolady. Bizdiń tórt, qasymyzdaǵy otbasynda alty bala bar. Bizge páteraqy da tólenbeı keledi. Qazirgi ýaqytta sotqa júginip, qala ákimdigi men prokýratýraǵa da bardyq. Jalpy, M.Júnisov kóshesi 24-mekenjaıynda tórt, oǵan qosa janymyzdaǵy eki qabatty úıde bes qojaıyn, sosyn bir jeke úı bar. Solardyń ornyna kópqabatty úı salynýy tıis. Osy másele tezirek sheshimin tapsa deımiz, — deıdi qala turǵyny Gúldana Súıinishqalıeva.
Atalǵan máselege oraı Kazinform tilshisi Oral qalasy ákimdigine saýal joldaǵan edi.
«Turǵyn úı qatynastary ortalyǵy» kommýnaldyq memlekettik mekemesi basshysynyń orynbasary Ádilbek Óteǵalıevtiń sózine qaraǵanda, kúni búgin M.Júnisov kóshesi 34-úı boıynsha jer qujattaryna baılanysty qurylys salýshy kompanııa «NazinWest» JShS jáne qalalyq qurylys jáne sáýlet bólimimen tıisti jumystar júrgizilip jatyr.
— «NazinWest» JShS jer qujattary sharýasy sheshilgen jaǵdaıda 2026 jyldyń kókteminde qurylys jumystaryn bastaýǵa daıyn ekenin aıtyp otyr. Jalpy, Oral qalasy boıynsha 60 apatty, 229 eski úı bar. Osy kezge deıin renovatsııa baǵdarlamasy boıynsha 34 apatty úı buzylyp, olardyń ornyna 18 úı salyndy, — dedi Ádilbek Óteǵalıev.
«NazinWest» JShS qyzmetkeri Samal Qabýlovanyń naqtylaýynsha, qurylystyń keshigýiniń birneshe sebebi bar.
— Bul týraly turǵyndar habardar. Biz olarǵa máseleni sheshýdiń úsh jolyn usyndyq. Birinshisi — kompanııa salǵan basqa kópqabatty úıden páter alý. Ekinshisi — osy úıdiń qurylysy aıaqtalǵanyn kútý. Úshinshisi — burynǵy turǵyn úıine saı sol kólemde osy mańdaǵy sondaı eski úılerdiń birinen baspana alyp bere alamyz. Biz máseleni sheshýge múddelimiz. Bul renovatsııa baǵdarlamasy aıasynda júzege asyrylatyn áleýmettik joba bolyp esepteledi. Eshkim pátersiz qalmaıdy. Muny turǵyndar da túsinýi kerek. Shyn mánisinde jaǵdaıy joq otbasylarǵa úı alǵansha páteraqysyn tólep, kómektesip otyramyz, — dep túsindirdi Samal Qabýlova.
Eske sala keteıik, budan buryn Oralda jataqhana turǵyndary jańbyr jaýsa, sý keshetinin aıtyp, dabyl qaqqanyn jazǵan edik.