Oralda «Altynshy beket» fılminiń premerasy boldy
ORAL. QazAqparat - Oral qalasynda «Altynshy beket» fılminiń premerasy boldy, dep habarlaıdy «QazAqparat» tilshisi.
Qazaqstandyq fılmdi oblys ortalyǵynda alǵashqy bolyp QR Ulttyq ulany «Batys» óńirlik qolbasshylyǵyna qarasty 5517-áskerı bóliminiń jaýyngerleri, sondaı-aq óńir jurtshylyǵy tamashalady.
Ulttyq ulannyń 2017-2019 jyldarǵa arnalǵan ımıdjdik baǵdarlamasyn oryndaý aıasynda QR Aqparat jáne kommýnıkatsııalar mınıstrliginiń tapsyrysymen qazaqstandyq «AıÝ SINEMA» kompanııasy «Habar» telearnasymen birlesip, «Altynshy beket» atty tolyq metrajdy kórkem fılmdi ótken jyldyń sońynda túsirgen bolatyn.
Sıýjet jelisine Ulttyq ulan jaýyngeri Erbol Otarbaevtyń erligi negiz bolǵan. Aqtaý qalasyndaǵy 6656-áskerı bóliminde qyzmetin ótep júrgen 19 jasar jigit 2010 jylǵy 22 maýsymda qatań tártiptegi túzetý mekemesinde qaraýylda turǵan edi. Sol kezde ol kolonııadan qashpaq bolǵan 21 jazasyn óteýshiniń jolyna jalǵyz ózi tosqaýyl qoıa bildi. Tún ishinde ózine qarsy júgirip kele jatqan qarýly topty kórgen jaýynger bastapqyda abdyrap qalǵanymen, tez saýatty áreket jasady. Onyń batyl is-qımyly arqasynda tutqyndar jaýynger kúzetip turǵan altynshy beketten óte almady.
Osy janqııarlyq erligi úshin E.Otarbaev Elbasynyń Jarlyǵymen ІІ dárejeli «Aıbyn» ordenimen marapattaldy. Keıin Ulttyq ulannyń áskerı ınstıtýtyn bitirgen Erbol qazirgi tańda ofıtser retinde qyzmet etedi.
Elge tanymal akterler túsken atalmysh fılm lańkestik pen ekstremızmniń aldyn alý baǵytynda, radıkaldy dinı aǵymdardy nasıhattaýǵa qarsy qolǵa alynǵan joba edi.
Aıta keteıik, táýelsizdik jyldary batyrlyǵy úshin 150-den astam áskerı qyzmetker memlekettik marapattarǵa ıe boldy. Sonyń 40-tan astamy ordendermen marapattaldy. Al Ulttyq ulannyń áskerı qyzmetkeri, polkovnık Qaırat Úmbetov Halyq qaharmany atandy. 2016 jyly 5 maýsym kúni lańkesterdiń Aqtóbe qalasyndaǵy áskerı bólimge shabýyl jasaǵany belgili. Mine, sonda óz ómirin qıǵan Berikjan Qalıev pen Dosbol Sapar ІІІ dárejeli «Aıbyn» ordenimen, aýyr jaralanǵan Syrym Súndetov pen Denıs Chernyshov «Jaýyngerlik erligi úshin» medalimen marapattalǵan edi.
Fılm premerasyna kishi serjant B.Qalıevtiń anasy Gúljan Erenova men zaıyby Nursulý Dosqalıeva, sondaı-aq órtten adamdy qutqarǵan maıor Salaýat Qabdyqulov, qarýly qylmyskerlerdi ustaǵan qatardaǵy jaýynger Qýanysh Saılaýov, Aýǵanstan jáne basqa sondaı qaýipti jerlerde áskerı boryshyn ótegender, jaýyngerler qatysyp, óz áserlerimen bólisti. Solardyń biri, 5517-áskerı bólimi rota komandıriniń orynbasary Ertýǵan Áýbákir osyndaı jarqyn úlgiler arqyly jas urpaqty otanshyldyq rýhta tárbıeleýge bolatynyn jetkizdi.
