Oralda «Altyn júrek dombyra» atty kúı keshi uıymdastyryldy
ORAL. 24 aqpan. QazAqparat - Batys Qazaqstan oblystyq qazaq drama teatrynda «Dana.kaz» jýrnalynyń jáne Qurmanǵazy atyndaǵy mýzyka kolledjiniń uıymdastyrýymen «Altyn júrek dombyra» atty kúı keshi ótkizildi.
Shara maqsaty el ishinde sırek oryndalatyn eski kúıler men án-termelerdi sahnaǵa shyǵarý edi. Keshti júrgizgen dombyrashy Dáýletkereı Qusaıynovtyń atap ótkenindeı, oryndaýshylardyń arasynda jasy seksennen asqan Ótegen Jumashevtan bastap býyny qatyp úlgermegen jastar da bar. Ótegen Jumashevtan basqa jasy jetpisti eńsergen Eshmat Ýsalımov, Oral qalasynda turatyn belgili dombyrashy ári osy aspapty jasaýshy sheber Edige Nábıev, Qurmanǵazy atyndaǵy mýzyka kolledjiniń dırektory Nurjan Sertekov, Tasqala aýdanynda qazaq halyq aspaptar orkestrin qurǵan Ermak Moldabekov syndy dombyrashylar kúılerdi óz babymen oryndady. Kontsert barysynda Farhat Orazov, Tilek Bazarov, Jasulan Janǵazıev, eń jas oryndaýshy Ádil Ahmetov jáne basqalar án-termelerdi oryndap, kópshilik kóńilin kóterdi.
«Dana.kaz» jýrnalynyń bas redaktory, belgili jýrnalıst Qazbek Qabjanov kontsertke qatysqan oryndaýshylarǵa alǵysyn bildirdi. Sondaı-aq olarǵa oblystyq mádenıet basqarmasy men «Isataı-Mahambet» qoǵamdyq qorynyń atynan alǵyshattar men eskertkish syılyqtar tapsyryldy.
