Oralda «Altyn kópir» halyqaralyq festıvali Abaıǵa arnaldy

BQO tilderdi damytý basqarmasynyń basshysy mindetin atqarýshy Sveta Ǵanıevanyń aıtýynsha, Reseıdegi qazaq dıasporasy ókilderimen mádenı baılanysty nyǵaıtý maqsatyn kózdeıtin shara bıyl ekinshi ret uıymdastyrylyp otyr.

Ótken jyly Oralǵa Reseıdiń kórshiles Saratov, Samara, Orynbor, Astrahan jáne Volgograd oblystarynan otyz shaqty jastar kelip, bes kúndik shara aıasynda bas qosyp, pikir almasqan edi. Solardyń usynys-tilekteri negizinde bıyl onlaın túrinde ótip jatqan festıval baǵdarlamasyna eresekter arasynda kórkem sóz oqý baıqaýy sekildi sharalar engizildi. Bul da – qazaq tiliniń aıasyn keńeıtýdiń bir joly.

Bıyl festıval aıasy keńeıe túsip, Máskeý, Tomsk, Novosibir, Barnaýl, Qorǵan, Ekaterınbýrg, Chelıabi, Altaı ólkesinen qazaq dıasporasynyń ókilderi, jastar kóshbasshylary onlaın túrde qatysyp, tájirıbe almasýǵa múmkindik aldy.

«Eýrazııa áıelderi forýmy» qoǵamdyq uıymy basshysynyń orynbasary, Máskeý qalasyndaǵy «To­mırıs» AKEU prodıýserlik orta­lyǵynyń dırektory Dámeli Tas­maǵambetovanyń atap ótkenindeı, mundaı festıvaldiń eki el azamattary arasyndaǵy ózara tıimdi qarym-qatynasty jolǵa qoıýdaǵy mańyzy zor. Ásirese, óziniń tili men mádenıetin, salt-dástúrin saqtaý úshin Reseıdegi qazaqtarǵa osyndaı tájirıbe alańyn qalyptastyrý óte qajet. Osy oraıda «Tomırıs» ortalyǵy shyǵarmashylyqpen aınalysatyn stýdentter men jastarǵa óz kómegin aıamaıtyny anyq. «Reseıdegi qazaqtar» derekti fılmi de túsirildi.

Elordadan ún qosqan «Otandastar qory» kommer­tsııalyq emes AQ prezıdentiniń keńesshisi Dı­dar Bolat ulttyq biregeılikti saqtaý úshin Reseıdegi qandastarymyzdy umytpaı, olarǵa túrli kómek kórsetýdiń mańyzdylyǵyn aıtty.

«Omby qazaqtary» qo­ǵamdyq uıymynyń basqarma tó­r­aǵasy Qýanysh Eleýtaevtyń sózine qaraǵanda, Omby óńirinde 100 myńdaı qazaq turady. Qazirgi tańda jas urpaqtyń ana tilin bilip, mádenıeti men salt-dástúrin saqtaýyna yqpal jasaý erekshe mańyzdy bolyp otyr.

BQO ákimi apparaty «Qoǵamdyq kelisim» mekemesiniń basshysy Medhat Qambetov Reseıdegi qazaqtarmen baılanystyń aldaǵy ýaqytta jalǵasatynyn jetkizdi. Koronavırýs indetimen kúres kezinde de Reseıdegi baýyrlar qazaqstandyqtarǵa qolushyn soza bildi.

«30 tamyz kúni qorytyndylanatyn festıval aıasynda «Abaı jáne Pýshkın» degen taqyrypta onlaın semınar ótedi. Onda ǵalymdar jer-jerden qosylyp, uly aqynymyzdyń shyǵarmashylyǵy, Pýshkınmen baılanysy týraly óz oı-tolǵamdarymen bólisedi. Oblystyq mýzeıge vırtýaldy saıahat jasalyp, dombyra jasaýdy, ulttyq bıdi úıretý, ulttyq sándik-qoldanbaly óner túrlerin jasaý boıynsha sheberlik sabaqtary, «Ulttyq kod negizi ulttyq tárbıede», «Jetistikke jetý formýlasy» taqyrybynda suhbat alańdary uıymdastyrylady. Al qazaq tilin oqytý kýrstary 20 qyrkúıekke deıin jalǵasady», dedi QazAqparat tilshisine Sveta Ǵanıeva.